Oongundu dhompilameno otadhi ningi ehololomadhiladhilo mongula opo omusamane Paulus Noa kaa shune mo we miilonga ye yuukuluntu wombelewa yokukondjitha uulingilingi.
Noa okondalaka ye yiilonga oya li ya pu ko kuyele nuumvo, ihe omupresidende gwoshilongo okwa li eyi lelepeke noomwedhi hamano. Oomwedhi hamano sho dha pu ko kehulilo lyomwedhi gwa yi omuperesidende okwa ningi etokolo opo Noa a shune mo miilonga ye uule womimvo ntano komeho.
Omuperesidende okwa li a ningi ngeyi shi ikwatelela kuutendo woveta mboka tawu gandja oonkondo komupresidende gwoshilongo a ulike omuntu ngoka ta ka longa mombelewa yokukondjitha uulingilingi.
Ihe oongundu dhimwe dhomopaliamente odhi li ompinge netokolo ndika lyokushuna mo Noa miilonga, tadhi ti Noa ina longa nawa ethimbo alihe ndyoka lyoomvula 16 a kala miilonga mbyoka.
Odha ti nokuli Noa okwa kala ta gamene aanenentu mboka ya fekelelwa okulunga twiitapula, unene tuu mboka yongundu yoSwapo. Oya hala nduno opo opoosa ndjika yuukuluntu wombelewa yokulwitha uulingilingi yi pitithwe aantu mboka ya hala opo ya ninge omaindilo.
Oongundu dhompilameno odha tokola opo dhi fale enyenyeto lyawo kompangu, dho tadhi ningi wo ehololomadhiladhilo tali kala ko mongula okutamekela poshipangelo shaKatutura.
Oongundu dhimwe ndhoka tadhi kutha ombinga menyenyeto ndika li li ompinge naNoa ongaashi oRDP, Swanu, RP, Nudo, NEFF, PDM, APP, AR, noUPM.
