Ehangano-ngeshefa lya yama kepangelo ndyoka tali ka gongela iishoshela niiyemo yepangelo ota li ti kutya kashi shi shoshili kutya aaniilonga yalyo otaya ka mona oondjambi dha ondoka noonkondo.

Ndhika odhe ya po konima sho oshifokundaneki shedhina Namibian Sun sha li sha nyola oshiwike sha za ko kutya aaniilonga yehangano ndika lyedhina Namibia Revenue Agency (NamRA) otaku tiwa oya ningilwa eyindilo opo ya kale haya futwa oondjambi dhi li pombanda.

Oshifokundaneki osha lopota tashi ti omukuluntuwiliki gwehangano ndika okwa tengenekwa a ka mone ondjambi yi thike lwopoN$200,000 momwedhi. Omanga aawiliki mboka ye li kohi ye taya ka mona oondjambi dhi li pokati koN$100  sigo N$200 000.

Ihe omukuluntuwiliki gwehangano ndika tate Sam Shivute okwa li a nyola omukanda gwa tuminwa iikundaneki ohela ta ti kutya kamu na uushili wiihwapo mehokololo ndyoka lya li lya nyanyangidhwa koshifokundaneki shoka.

Shivute okwa ti ehangano lyawo ndyoka lya tameka niilonga momasiku 7 Apilili gwo2021 oli na oshinakugwanithwa shokugongela iishoshela niiyemo yepangelo, shi ikwatelela kompango ndjoka yoNamibia Revenue Agency yo2017 (Act No. 12 of 2017).

“Ihe nashi ye okawi nokawi kutya ewiliko lyaNamRA inali ninga nando eindilo kewiliko lyopombanda (Board) shi na sha noondjambi dhaaniilonga. Ngele oNamibian Sun otayi ti kutya opu na eindilo lya ningwa, otatu indile opo oshifokundaneki shika shi holole ngoka e ya pa uuyelele wa tya ngawo,” Shivute ta ti.

“Otwa hala shi kale sha yela kutya oondjambi dhaaniilonga yoNamRA odhi li naanaa momilandu ndhono dha tulwa po kompango yoPublic Enterprises Governance Act 2019 (Act No.1 of 2019).

“Otwa koneke kutya etoto po lyoNamRA olya fa inali taambwa ko nawa kuyamwe, unene tuu mboka ya hala oku kala itaya futu iishoshela yepangelo. Ano eandjaganeko lyiikundaneki mbika osha fa naanaa sha hala oku dhenga aaniilonga yetu iihwa komeho opo yaaha ipyakidhile nawa niilonga yawo yokugongela iishoshela yokongulu.”

Shivute okwa popi ngeyi molwa aantu oyendji mboka ya kala taya popi neyeme kutya aaniilonga mbaka yaNamRA oya fa nani taya ka lya oshilongo nomagadhi gasho.

Advertisements