Ehangano hali andjaganeke olusheno kOnooli yoshilongo lyedhina NORED olya ti otali ka fala olusheno komagumbo gaakadhona mboka ya tula edhina lyoshilongo pombanda momaudhano goOlympics ndjoka ya li ya ningilwa koJapan uule wethimbo lyiiwike iyali ya zi ko.
Uukadhona woomvula 18 Christine Mboma naBeatrice Masilingi owa li wa kutha ombinga muudhano wokumatuka ondapo yoshidhudhu yoometa omathele gaali.
Mboma okwe ya omutiyali omanga Masilingi e ya omutihamano mokati kuukadhona omanyakwa mokumatuka wa za kiilongo ngaashi Jamaika naAmerika. Uukadhona waNamibia owa li wa nyanyudha oshigwana sho wa longo nawa ngaaka e tawu pewa omagano ogendji komahangano goongeshefa.
NORED naye okwa ti oku na okugandja olupandu kuukadhona mbuka pamukalo wokuya falela olusheno komagumbo hoka haya zi.
Omupopiliko gwaNORED tate Simon Lukas okwa popi ta ti ngeyi:
“Molwaashono, NORED okwa nyanyukwa okutseyitha kutya otatu gandja eyambidhidho lyoku fala olusheno kegumbo lyaandjawo yaMboma komukunda Sinyungwe, mOshikandjohogololo shaNdiyona, osho wo kaandjawo yaMasilingi mondoolopa yaRundu, mOshikandjohogololo shaRundu gwoNdoolopa.
“Noshikwawo otwa hala oku pandula shinenenene molwa oshilonga sha longwa kuukadhona wetu mbuka, unene tuu Christine ngoka a sindana ombandi yoshisiliveli mondapo yoometa 200.
“Owa longa nawa shili mukadhona.
“Omaudhano oge li ongudhi yimwe yomiinakugwanithwa yetu yokugandja sha moshigwana, ano NORED ota pula komeho mokuyambidhidha omaudhano gaagundjuka.”
Sho a pulwa ngele olusheno otalu ka thika wo momagumbo gaashiinda yaMboma naMasilingi, Lukas okwa ti: “Kashiko, kashiko nando. Olusheno nduka kalushi lwaashiinda ndele otalu yi lu ukilila tuu momagumbo moka hamu zi uunona mbuka. Ngoka a longa sha, oye ta pewa sha.”
Methano: Christine Mboma naBeatrice Masilingi taya nyanyudha uuyuni ya tya epandela lyoshilongo shaandjawo Namibia.
