Osipana yonetball yedhina Cobra Netball Club oya li ya nyanyudha oyendji sho ya li tayi shi enditha nawa momaudhano goFatou Annual Tournament ngoka ga li ko ehuliloshiwike lyazi ko mOshifo moRuacana.
Cobra okwa li a dhana nawa sigo ta sindana po ekopi ndyoka lya li tali kondjelwa.
Cobra ngoka ha yambuka mOngwediva okwa li a pewa wo oodola N$5,000 molwa esindano lyawo osho wo oomedalia dhoshingoli.
Osipana yomegumbo ndjoka yedhina Fatou Netball Club oya li ye ya puutiyali sho yali ya likamo kuCobra muudhano wa hugunina, e tayi mono po oodola N$3,000 osho wo oomedalia dhoshisiliveli.
Omaudhano ngaka otaga kala haga ningwa omumvo kehe taga ningilwa mondoolopa yaRuacana mOshifo.
Methano: Aadhani yaCobra osho wo aadheuli naayambidhidhi yosipana otaya tyapula esindano lyawo.
