Oopelesenda ashike omilongo ndatu (30%) dhiihakautu hayi liwa moNamibia oyo ya longwa moshilongo. Tashi ti 70% dhiihakautu moositola nomalandithilo moNamibia ohayi zi pondje yoshilongo.
Shika osha li sha popiwa komunambelewa gwehangano Namibia Agronomic Board ngoka e na sha nekondololo lyiikwakulya ya longwa momapya niikunino, meme Emilie Abraham.
Abraham okwa li ta popi poshigongiilonga sha li sha ithana aanangeshefa opo ya lombwelwe nkene oonkatu dha tya uuna omuntu wa hala iilongomwa yoye yi landithwe moositola oonene ngaashi Shoprite naPick ‘n Pay.
“Osho onkundana ombwinayi, sho iihakautu mbyoka hatu lyeni oyi li oopelesenda ashike 30 ya limwa moshilongo shetu,” meme Abraham ta ti.
“Iihakautu ohayi longithwa noyi holike noonkondo, hayi longithwa moosalada poohango niituthi nomoorestauranta. Nokuli piituthi omuntu ngele owemu pe iikulya yaahe na oshihakautu ota yemata noonkondo.”
Abraham okwa ti okwa kala oompito odhindji moshimpungu shuulimimapya niikunino opo oshigwana shi longe iikulya ya gwanena, kwaaha landwe we iikulya pondje yoshilongo.
Okwa ti wo kutya oshimpungu shuunamapya nuuniimuna ohashi kutu wo aantu oyendi, aantu yaahe na oonzapo nuulongelwe washa, ano otashi vulu oku kandula po omukundu gokwaahe na iilonga.
Abraham okwa ti omatama ge li po57% haga liwa moshilongo oga longwa moshilongo, omanga oopelesenda 43 hagazi pondje yoshilongo.
Iikapa yoopelesenda 48 ohayi longwa moshilongo, omanga omakebindja ge thike poopelesenda 90 haga liwa moshilongo oga longwa moshilongo. Ano oopelesenda ashike 10 dhomakebindja odho hadhi zi pondje yoshilongo.
Abraham okwa ti wo kutya molwa uupyakadhi weetwa koCovid-19 aantu oyendji oya holola ohokwe yoku longa omapya niikunino opo ya longe iikulya tayi gwanene oshigwana ko ku yandwe ondjala molwa omaupyakadhi goku inekela elando lyiikulya pondje yoshilongo.
Methano: Iihakautu.
