Martin Negumbo |
Tomorrow’s Generation FC oya sindana po otonamenda yoBACK TO SPORT DAY ON THE MOVE ndjoka ya ningilwa pokapale kaAmunganda mehuliloshiwike lyaziko.
Uudhano wetanga lyokoompadhi mboka wa unganekwa kuAndreas Nakankeya owa tamekele mOlyomakaya e tawu hulu mOsoondaha. Uudhano owa dhanenwa pokapale kaAmunganda hoka ke li popepi noskola, noospana odhindji odhali dha kutha ombinga muudhano mwa kwatelwa nospana yomukwaniilwa Shuumbwa.
Oosipana dha kutha ombinga odho Amunganda FC, Elly Moo FC, Onelago United, Onelago FC, Tommy Midas FC, Tomorrow Generation FC, Amakhosi FC, naGK FC.
Uudhano wa hugunina owa sindanwapo koTomorrow’s Genertion hayi yambuka pOmusati Gopoosa, ya dhenge Tommy Midas 1-0 e tayi mono okapandi koodola 2000, etanga limwe osho wo okahiya niikamusino yetanga omapando 12.
Puutiyali opweya oTommy Midas ya mono N$1000, netanga, nokahiya; puutitatu opweya Shuumbwa, e ta mono N$300 netanga, nokahiya; puutine opweya Onelago United ya mono etanga nokahiya.
Omaudhano gaakokele (Old Crocks) oga sindanwa po kuKalimbo & friends sho a dhenge Akuna Legends yimwe yomonola.
Nonando pomaudhano ogendji ohapu holoka omapiyagano nomanyenyeto mpaka inapu holoka nande omakuyunguto gasha.
Oshigwana osha li sha pandula wo omusamane Herman Kalimbo ngoka oye a wilike omaudhano.
Methano: Tomorrow’s Generation ta tyapula esindano lye.
