Minista gwOshimaliwa tate Ipumbu Shiimi okwa li a popi a ti kutya oye li ya tameka niilonga yoku longa mo omulandulongitho gwoopoloyeka dhiikunino ayihe yepangelo opo yi galukile kondjila moku longa iikulya.
Shiimi okwa li a popi ndhika sho a pititha ombandjeta yepangelo yomumvo nguka, eshi ninga mopaliamende oshiwike sha zi ko.
Konyala iikunino yepangelo ayihe oya ninga oomvula dhontumba itayi shi enditha nawa. Dhimwe odha kala ashike tadhi longo dha nkundipala no itadhi eta po sha shomupondo sigo mpoka she ya ponkatu mpoka epangelo lya li lya tokola li hulithe po iilonga yehangano lya yama kepangelo ndyoka lya kala hali wilike iikunino mbika.
Ehanganongeshefa ndika lyedhina Agriculture Business Development Agency (AgribusDev) olya kala tali nyenyetwa kaaniilonga yomiikunino kutya itali longo nawa.
“Sho kwa ningwa etokolo opo iikunino yepangelo yi gandjwe koohandimwe mboka ya hala okuyi longitha taya hiila, okwa tamekiwa nomalongekidho goku pititha ootendela opo aakwashigwana, omahangano gopaumwene nenge mboka ye imanga kumwe ya hiile po iikunino mbika,” Shiimi ta ti.
Epangelo oli na iikunino ya thika pomulongo nasha, ngaashi Etunda mOmusati, Ndonga Linena, na Uvhungu Vhungu moKavango, Liselo moZambezi, osho wo yimwe yi li moHardap.
Methano: Etunda sho omavi ga li omayamba. (Ethano ku kundana.com)
