Ehangano lyedhina International Peace Youth Group (IPYG) osho wo ehangano lyedhina Rob Youth Foundation oga tula uukuni kumwe opo ya longele uuwanawa nuukaliwonawa woshigwana unene nge tashi ya moku kondjitha omaupyakadhi ga taalela aagundjuka.
IPYG olyo ehangano ihali ningi oshimaliwa noinali yama kepangelo, ihe olya itaala kutya aagundjuka otaya vulu oku eta po ombili muuyuni.
Ehangano oli na omalalakano goku yambulapo onkalo yaagundjuka, oku ya pukulula noku gandja uuyelele kombinga yuukalinawa, nosho tuu.
Sho a popi poshituthi sheuvathano-longelokumwe, Robert Maseka ngoka oye omutoti gwehangano ndika lyoRob Youth Foundation okwa ti kutya okwa mona sha simana okulongela kumwe naayehe mboka ye na omalalakano gokuyambulapo aagundjuka ngaashi mokuya pukulula miinima yi na sha nomategelelo gopethimbo lyuunyasha, elongitho lyiingangamithi, osho wo okwaahe na iilonga.
“Onde inekela kutya elongelokumwe ndika otali ka ninga opo tu pondole oshindji moku kwatha aagundjuka monakuyiwa yawo unene tuu mboka ye li poondondo dhopevi notaahupu shokadhila,” Maseka ta ti.
Aina Shiimi ngoka oye omukwatakanithi noshigwana gwehangano lyedhina Heavenly Culture World Peace Restoration of Light (HWPL) okwa ti osha simana noonkondo sho omahangano taga longele kumwe.
“Onda itaala lela kutya otatu ka kala siku limwe tu na omukalelipo gwaNamibia miituthi yopauyuni ta ka ulika nkene taku longwa oku etitha po ombili moNamibia, notandi tala komeho nda hala oku mona iilonga iiwanawa mbyoka omahangano ngano taga ke yi longa,” Aina ta ti.
Methano: Aina Shiimi, Robert Maseka naMichael Hamutenya.
