Omunashipundi gwoshiketha shopenzela yaaniilonga yiikondo yepangelo (GIPF) okwa ti ehangano lyawo oli li nawa nokali na nando uupyakadhi washa kombinga yoshimaliwa.
Meme Nilian Mulemi okwa popi ndhika oshiwike sha zi ko sho ya pititha olopota ndjoka ya konakona uukalinawa woshiketha shawo shika shoGIPF.
“Aawiliki yoshiketha oya koneke kutya aakwashigwana oyendji oye na ohokwe mokutala nkene oGIPF tayi longo oshoka iilyo yetu oyo oyindji noya za koombinga dhayooloka. Yo ishewe oGIPF osho oshiketha oshinenenene moshilongo shi na eliko lya konda poN$130 billion,” Mulemi ta popi.
Mulemi okwa ti ekonakono lyuukalinawa woshiketha shopenzela yaaniilonga olya ningwa kaakonakoni ye ithikamena kuyoyene opo ya tale kutya uundjolowele woshiketha pakuyelekanitha iiniwe yasho noongunga dhasho owa thikama peni.
“Onda nyanyukwa okulopota kutya GIPF okwa kala ta gwanitha po oshinakugwanitha she shopaveta opo a kale ha konakonwa komukonakoni e ithikamena po kehe konima yoomvula ndatu.
“Onda nyanyukwa wo oku lopota kutya omukonakoni okwa gandja olopota tayi ti kutya oshiketha shetu oshi na iiyemo ya kola notashi vulu oku futa iilyo yetu mbyoka tayi yi mopenzela pwaa na uupyakadhi washa,” Mulemi ta ti.
Methano: Nilian Mulemi.
