Oshiputudhilo shelongo lyopombanda oInternational University of Management (IUM) nena osha tseyitha kutya otashi tameke niilonga yokutunga omatungo moka aalongwa yawo taya ka longelwa mEenhana.
Ehala ndyoka li li mondjila yedhina Sam Nujoma Road, popepi nosikola yopevi yedhina Paulus Hamutenya osho wo osekundosikola yedhina Haimbili Haufiku, otapu ka tungwa omatungo goshiputudhilo IUM taga tungwa koshimaliwa shi thike poN$25 million.
Sho a popi poshiithanene she tseyitho ndika nena mEenhana omutotipo gwoshiputudhilo shika shedhina IUM Dr. David Namwandi okwa ti oshi li naanaa pamulandudhiladhilo gwoshiputudhilo shawo oku eta elongo lyondondo yopombanda popepi noshigwana.
“Otandi indile aavali yomOshitopolwa shaHangwena opo mu ka ete uunona weni mpaka, wu longelwa mpano, moIUM,” Namwandi ta ti. “Inamu ka uvitha ndje nande nayi, mu tume uunona kokule, kOvenduka nenge peni. Oshiputudhilo osha thika moshitopolwa sheni.
“Tse ohatu gandja elongo lyopombanda, opo uunona wu ka mone oompito dhiilonga kehe mpoka moNamibia osho wo pondje yoshilongo.”
Ngashingeyi IUM ota adhika mOvenduka, mOngwediva, mOmbaye, Nkurenkuru, osho wo mEenhana ngele omatungo oga pu oku tungwa.
Methano: Gavena gwaHangwena Walde Ndevashiya, Dr. David Namwandi, osho wo Meya gwaEenhana Omri-Onn Kavandje taya tatula emanya mpoka tapu ka tungwa oIUM mEenhana.
