Omupevi-presidende Nangolo Mbumba okwa patulula nena pambelewa omauliko giipindi gokomumvo gaNgwediva.
Omauliko giipindi ngaka taga ningwa oshikando oshitimilongombali oga li ga tameke momasiku 26 gaAguste notaga hulu mulyotango lyaSepetemba.
Mbumba ngoka a lesha oshipopiwa shomupresidende Hage Geingob ngoka ina vula okuholoka molwa omaimbo giinakugwanithwa yilwe, okwa ti okwa pandula Elelo lyOndoolopa yaNgwediva sho lyi itula mo moku longekidha omauliko goludhi nduka sho aauliki yiipindi yomoshilongo osho wo yopondje yoshilongo taya mono ompito yoku ulika iipindi yawo.
Aauliki yiipindi ya konda po350 otaya ulike iipindi yawo mEndiki lyOmauliko gIipindi mOngwediva.
Omuwiliki gwoshilongo okwa ti kutya osha simana opo aalongekidhi yomauliko giipindi ngaka ya kale haya longele kumwe nepangelo osho wo iikondo yopaumwene opo iilonga yokuyambula po eliko lyoshilongo yi longwe pamuhanga.
“Eliko lyoshilongo shetu olya kala shili tali shongola, molwa uupyakadhi woshikukuta, noCovid-19, osho wo onkalo ndjoka kayi li wo nawa yeliko lyuuyuni,” Omupresidende ta ti. “Ihe ngashingeyi oshinima otashi ende tashi ya kuuwanawa.
“Ano natu longeleni kumwe, tu ningeni oompangela pamwe, noku dhiladhila pamwe opo oshilongo shetu shi yambuke po.”
Mbumba okwali e ya nosheendo sha kwatela mo Omupilima-minista Saara Kuugongelwa-Amadhila osho wo Minista wOofambulika nIipindi Lucia Ipumbu.
Methano: Omupevipresidende Nangolo Mbumba ta lesha oshipopiwa shaDr Hage Geingob.
