Okuza nena ndjika Ndjayi gwEtanga Lyopolisi (E li mOshipundi shEvululuko) Sebastian Ndeitunga okwa tameka iilonga yuuGavena wOshitopolwa shaHangwena.
Gavena omupe nguka gwaHangwena okwa tseyithwa kOmbelewa yOmupresidende Hage Geingob, ngoka momushangwa gwa pitithwa ohela a ti kutya Ndeitunga okwa pewa oshinakugwanithwa shuuGavena she ikwatelela koonkondo nuuthemba wOmuwiliki gwOshilongo e dhi pewa kokatendo 32 4(a) nokatendo 110A wekotampango lyoshilongo Namibia.
“Gavena omupe okwa tegelelwa opo a ka tsikile netulo miilongo lyoopolohalama osho wo oopoloyeka dhOshitopolwa shaHangwena she ikwatelela komatengeneko-miyalu dhoshimaliwa sha gandjwa,” omushangwa gwa pitithwa kuDr Alfredo Tjiurimo Hengari ngoka oye omupopiliko gwOmupresidente osho gwa ti.
Geingob okwa ti wo kutya oku na einekelo kutya Ndeitunga iilonga yuuGavena ote ke yi longa e teyi gwanitha po ngaashi eshi inekelelwa.
“Omusimanekwa Walde Ndevashiya okwa kuthwa ano oshinakugwanithwa shuuGavena waHangwena okuza momasiku 16 gaNovemba 2023,” osho Omupresidende a popi, e ta pandula wo Ndevashiya molwa iilonga mbyoka yuuGavena e yi longa pethimbo a kala mombelewa yuuGavena.
Methano: Kakukutu kwali komatanga gopolisi Sebastian Ndeitunga.
