Komufita weongalo eli Rev. Sakeus Shikololo Ndemuweda opamwe novayakuli vetu vopamhepo amushe mu li omu mongeleka iyapuki, kofamili yaTangeni naLukas, kuNgoloneya wOhangwena neekansela doikandjohoololo mwe uya, kuMayola wodoolopa Eenhana neekansela amushe deedoolopa mu li omu, kovanangeshefa amushe mu li omu, kovanambelewa meendodo da yooloka, kookaume noshoyo atusheni twa ngudumana nena.
Nandi mu kunde medina laJesus Kristus ou a li ko noku li ko nota ka kala ko.
Vaholike natu tambuleni ehekeleko tali di kOmwene wetu omushiti wetu nomuufi waashishe ngaashi Ombibeli tai ti nge tate Kalunga ohetu pe ei iwa oshike itatu pitikwa tu pite momaudjuu, nongeenge ta teya epya laye naye yoo oha hoolola mo ombuto oyo iwa nawa.
Onghee natu tambuleni ombili yaJesus nyee tamu pitike nge ndi fimaneke omhito ei ame ndi popye ponhele yovanangeshefa vakwetu moshilando shaEenhana, onga ndi li omunashipundi omu modoolopa yetu.
Edina lange aame Linea Haimbodi, ndi li omunashipundi wehangano lovanangeshefa oNCCI mEenanha. Nonda fikama apa, opo ndi longife omhito ei ndei lineekelelwa ndi tye sha ponhele yehangano lovanangeshefa NCCI. Moshitufi eshi shokudimbulukwa edjepo lovanangeshefa vetu vavali moshilando eshi.
Ombelewa yetu yoNCCI oya kundana noluhodi linene efyo lombaadilila laImmanuel Tangeni nomukulu waye Lukas Shiwomwenyo momafiku 25 Novemba, efimbo longula elela eshi twa uda kutya ovanangeshefa va li motuwa ya nyolwa ‘Ohandjombali’ oya wila momeva.
Ehangano lovanangeshefa oli udite oluhodi molwa efyo lovanangeshefa vakwetu ava vomoshilando eshi shetu.
Ovalumenhu ava okwali tava longo tava endelele, vo alushe ova kala ve lipyakidila. Ondi wete kape na ou ta pataneke nge nge handi ti otuwa “SHAPWANALE” otuwa yo bisinesa notashi kolekwa kovanhu vahapu, nounona ava va fya kwali tava monika vashona kakele meendunge ovakulunhu.
Tangeni otwe mu shiiva moshilando eshi omanga a li ha shingi otaxi, ashike okwa kala omunandjungu moilonga yaye. Nota hokololwa kutya okwa kala ha longo noplana hano ondunge dilaadilo yoilonga yaye, e shii kutya ohandi longo eshi nonda hala oku mona shike (vision to achieve).
Vaholike edjepo lovanangeshefa ava oletu kuma unene noletu nyikifa oluhodi onghee otu udite pamwe nanye oluhodi linene osheshi ovanangeshefa ava okwali ve na mo oshinakuwanifwa shokufoloma eedopi opo ovakalimo vetu va dje mo meebashu omolwa exumokomesho loshilando shetweni.
Onghee ehangano lovanangeshefa otali yandje omahekeleko moluhodi eli lovanangeshefa vetu. Immanuel naLukas okwali twe va pewa kutate Kalunga opo va yakule oshiwana moshilando eshi nonande otu wete efimbo olishona, Omwene okwa tala oshawana.
Onghee ohatu pula eenghono kOmwene oye ha pe ava va loloka eenghono, nafye yoo otwe lineekela otetu pe eenghono opo tu dule oku twikila nonghalamwenyo ihe na Tangeni naLukas.
Nonande ongaho ohatu kala nokuva pongola ashike otwa itavela Omwene otetu tumbeni noku tu hekelekeni atusheni noluhodi eli lidjuu noli na ondjokonona inyanyalifa modoolopa omu.
Kofamili naatusheni alushe shama mokati ketu mwa kufwa umwe etango ohali kala la fa la fikama nohali kala la fa itali piti koushilo noi ta li ningine kouninginino. Notu udite eshi tashi linyenge mufyeni oukaume nohole.
Ehaluko nomapulo ka e na omanyamukulo omahapu mukeshe umwe, (onghundana yokombada yoshifo) oshikumwifi, ashike omunhu keshe oku na oku shuna keumbo oku a dile.
Otu udite otuneni odjuulufi yefiku keshe lipe la wedwa ko ile oshitya shimwe shehekeleko sha wedwa ko shi li po, natu liyandjeni kuJesus oye otetu kwafeni atushe. Ndee hatu tambuleni kutya ovaholike vetu Omwene okwe va dimbula mo moinakuwanifwa yavo yokedu.
Nonande otu wetu ovashona unene, ashike tate Kalunga okwa ti keshe umwe ota ifanwa palufo laye nopefimbo laye kashi na sha needula ndele onehalo laKalunga mwene.
Nande twa li tu hole ounona ava katu na eenghono oku va kaleka po osheshi eenghalamwenyo davo kadi li momake etweni.
Onghee fye vehangano loNCCI katu na omalimbililo ovanangeshefa vetu ove mu fiila omadimbulukifo ile omadidiliko mahapu mawa itamu dulu oku a dimbwa.
Mefiku lonena otashi kala shidjuu oku koneka osho shiwa ashike moku ke shi tanaunina molupandu eshi Omwene e ku pele otashi kala omukumo unene noto kala wa pama mOmwene.
Ovanangeshefa ovaholike nookaume kovanangeshefa wetu, osho yo ofamili novakalimo amushe moshilando shaEenhana omwa ninga nawa, ondemu pandula olupandu tali di koshi yomutima wange, eshi twa kaleni moukumwe umwe okudja etitano ladja ko, ofiyo onena eshi tu li apa.
Ondi udite etumba oku kala omunashipundi wovanangeshefa omolwa nye mu li ovanamitima nghenda inamu luvapala oku yandja opo ndemu lilila oufyoona omwa nyamukula no inamu sholola oku uya apa nena.
Eshi otashi holola kutya moshilando omu omu na ovaitaveli vahapu nomu na ovanamitimanghenda voshili. Osho twa ningileni oonakufya vetu oshili nashi ninge ombuto iwa itai lembe, nOmwene ota ti ovanelao ovananghenda osheshi ovo tava ka filwa onghenda.
Oonakufiwa po ovaholike ehangano loNCCI otali mu halele omukumo, etalaleko, nehekeleko loshili, tali mu dile kOmwene, mwene womahekeleko nomukwafi waaveshe.
Omwenyo waLukas Shiwomwenyo na Immanuel Tangeni, Omwene neu pe etulumuko laalushe, ndele tava dulu oku tulumukwa mombili yaalushe.
– Linea Haimbodi oye omunashipundi woshitayi shoNCCI mEenhana, nokwa li a lesha oshipopiwa eshi poshitufidimbuluko sha ningilwe mongeleka yaAnglikana mEenhana mu 1 Desemba.(Mefano: Me Linea pamwe navamwe vomovanangeshefa vomEenhana.)
