Tutungeni oshilongo shetu
Victor Angula /
Iilongo nkene ya tya ohai tungwa kaantu. Ano aantu oyo haya tungu iilongo.
Shika osho oshinakugwanithwa oshinene tu neni onga aakwashigwana yoshilongo sha manguluka.
Tse katushi aapika nenge aapongekwa ihe otu neni oshilongo notu li moshilongo shetu.
Uuyuni owu na iilongo oyindji, wo owu na wo aantu oyendji ye li miilongo moka. Kehe oshilongo oshi na aantu yasho, mboka oyo aakwashigwana yoshilongo shoka, ano ye na uuthemba okuhogolola momahogololo gaaleli yoshilongo shawo.
Noye na uuthemba wokupopya nokutula po oompangela nkene oshilongo shawo ya hala shi kale.
Aantu mboka ye li moshilongo shawo ohaku tiwa oyo aantu ya manguluka, ya manguluka ongaashi omuntu wu li maandjeni.
Ano aantu ya tya ngeyi ohaya tulwa oshinakugwanithwa oshinene nosha simana komapepe gawo. Oshinakugwanithwa shika osho iilonga yokutunga nokuyambulapo oshilongo shawo.
Kapu na omuntu tazi hoka nenge hwiyaka e te ya e na elalakano a tunge oshilongo sheni. Omuntu iha tungu oshilongo shamukwawo. Kehe omuntu oku na oshinakugwanithwa shoku tunga oshilongo shaandjawo.
Ano tse Aanamibia natse otu neni oshinakugwanithwa shokutunga Namibia opo Namibia a yambuke po paliko, pankalathano osho wo papolitika.
Aanona yosikola sho taya ilongo naya ilonge ye na elalakano lyoku mona uunongo noondunge dhokuyambula po oshilongo shawo. Aaniilonga ye li miikondo niimpungu ya yooloka naya longe kehe esiku ye na elalakano lyoku tunga nokuyambulapo oshilongo shawo.
Aaleli naawiliki yi ili noyi ili naya longe kehe esiku ye na elalakano lyokutunga noku yambula po oshilongo shawo.
Ano kehe ngoka ta ningi sha nenge ta longo osha neshi longe neyitulomo oshoka iilonga oyo hayi tungu oshilongo.
Mboka yaa na iilonga naya kambadhale opo ya mone iilonga nenge ya nyangadhale nokuninga sha shoka tashi gwedha ko notashi yambidhidha meyambulopo lyoshigwana momukalo kehe tagu vulika.
Mboka ye na oompito nenge oondunge nuunongo woku eta po oompito dhiilonga naya ninge ngaaka oshoka iilonga oyo hayi tungu oshilongo.
Shika osho oshilongo shetu. Ngele itatu shi tungu, otashi ka tungwa kulye? Ngele itatu shi tungu otashi teka po, e tashi kuthwa ko kuyamwe taya ka za kiilongo yilwe.
