Omandiki haga putudha uunona woomvula oonshona, ngoka haku tiwa ookinda, noge li momidhingoloko moka tamu matuka omeya gefundja naga pate manga sigo uunandoka onkalo yomeya ya shuna pevi.
Ndhika odha popiwa nena komunambelewa omukuluntu wiilonga yomoshigwana mUuministeli wUukashikekookantu, nEkandulopo lyOluhepo, gwomOshitopolwa Oshana meme Laina Ileka.
Ileka okwa li ta popi moonkundathana dhokugandja omauyelele mendiki lyokulongekidha omakwatho geulumompumbwe osho wo egandjo lyomauyelele kombinga yuupyakadhi wefundja mOshitopolwa Oshana.
Ileka okwa ti wo kutya uunona mboka wu li pamwe naakuluntu yawo mootenda dhopEhenye mOshakati sho ya tembudhwa mo momagumbo gawo molwa omeya, otaya ka mona omakwatho opo ya kale mootenda moka taya monene mo omayakulo gosikola pethimbo ndika sho itaya yi we manga koosikola dhawo.
“Omakwatho ngaashi kombinga yiipundi niitaafula osho wo iilongitho yilwe otayi ka gandjwa mbala. Educarers oye ta ka kala noshinakugwanithwa shoku sila uunona oshimpwiyu kombinga yelongo lyawo,” meme Ileka ta ti.
Ileka okwa gwedha ko wo ta ti aakuluntu naya tonatele uunona nokuwu sila nawa oshimpwiyu pethimbo ndika lyomeya ogendji taga adhika moshitopolwa.
Methano: Tate Jonas Kapenda, meme Laina Ileka nameme Hileni Mwandingi taya kundathana shoka sha ningwa po nenge tashi ka ningwa kombinga yuupyakadhi wefundja mOshana.
