Tokolo naye a ganeke wo: okayolithi

kuMartin Negumbo|

Posikola yedhina Amunganda ndjoka yi li komikunda opwa li hapu sikola omumati a tseyika nawa edhina lye Tokolo ngoka a li kehe mondondo okwa ya mo u undulwa oshoka muye iilongwa kaya li hayi kwata mo nande.

Oyendji oya kala haye mu ula kutya oye omunyengwi.

Okamati haka oka li okamweni ihe oka li okafuuli tuu shili, onkene shika osha thiminike aalongi ya kale yehole engungumano lyako mongulu oshowo molugumbo lwosikola nande ko okali kaa na omagano mosikola.

Etitano limwe omulongi gwOshindonga mondondo ontihetatu okwe ya opo a longe ngaashi shito mondondo ndjoka yooTokolo.

Yefulou Miiana sho a longa longa po kashona okwa kala okathimbo a mwena, ye a hala oku ya nande ethimbo ina li pwa ko. Molwaasho okwa li omukotoki ka li ta vulu oku ya inaa pula uunona epulo lya kitakana.

Onkene okwa li a pula okapulo kanathangwa ta ti: “Onda hala mu yamukulile ndje epulo ndika, naangu te ke li yamukula otandi mu pe N$20.

“Epulo, NGU E YA PO TANGO NAANGU A ADHIKA PO, OLYE A THIKI PO TANGO?”

Nonande aalongwa ya li ye wete epulo lya fa epu kapu na ngu e li eta, nolya nyenge naamba ye na omitse dhe endelela nohaya piti aatango Tashiya naMazimbuko.

Konyala aanasikola ayehe mongulu oya kambadhala oshoka epulo olyoshimaliwa, naangoka te ke li yamukula mondjila ota ka kala mo nawa mehuliloshiwike.

Hugunina kiipundi yokonima okwa monika onyala onde ya ganeka muule yo tayi topa noonkondo, nayefulou Miiana sho e ende po okonyala yi mu tse momeho.

Onyala oya li yaTokolo ngoka a dhinika. Aantu ayehe oya ti thilu, yeshi kuminwa Tokolo a ganeka ye ihaa ganeke shito. Yefulou naye okwa li a kumwa shili.

Yefulou okwa yi e ta thikama komeho gaalongwa e li popepi noshipelende e ta ti: “Eewa, Tokolo, tu pa ano eyamukulo. Otwendi oyo ndji.”

Tokolo okwa thikama nawa nawa e tiikolomona, naantu oya li ya mwena ya tega eyamukulo li gandjwe sho oshimaliwa shi yiwe nasho kuTokolo. Mokahwa wa dhina omo mwa kala tuu ndimba.

“Yefulou,” Tokolo ta yi mo nomukumo, “nangaye onda ganeke opo ndiku lombwele kutya nangame eyamukulo kandi li shi.”

Ongundu ayihe oya yolo mokule oshoka hasho kwali ya tegelela shoka. Nayefulou Miiana okwa piti mo ta tilehi oshindjola, nokuli okonyala a punduke sho ta piti pomweelo.

Advertisements