Etanga lyopolisi yaNamibia otali kutu aapolisi ye thike po750 nuumvo. Ihe otali pula aantu mboka ya pita nawa oyo ayeke ya ninge omayindilo.
Ndhino odha popiwa komukuluntu gwoshikondo shopolisi Leutenanda-general Joseph Shikongo momukanda tawu gandja uuyelele awuhe kombinga yiinakugwanithwa po mbyoka tayi pumbiwa.
Miinakugwanithwa omwa kwatelwa mbyoka tayi ti kutya omuningi gweyindilo na kale e na onzapo yondondo 12 (nenge ondondo 11 yomulandu gwelongo omupe) ya pita niitsa 25 osho wo o“E” mOshiingilisa.
Na kale wo Omunamibia e na oomvula dhopokati ko18 sigo 35. Na kale wo e shi nawa okupopya nokukundathana melaka lyopambelewa.
Omukuluntu gwopolisi ota pula wo opo omuningi gweyindilo kaaha kale e na uuwehame nenge uulema washa mboka tawu vulu oku ninga opo a ka longe nuudhigu iilonga yuupolisi.
Aantu oyendji oya li ya tegelela opolisi yi ka kute aantu oyendji yo yi kandule po uupyakadhi wokwaahe na iilonga moshilongo, ihe nani hasho tashi ka ningwa sho taku kutwa ashike ye li 750.
Yo iinakugwanithwa mbyoka yi li pombanda ngaashi iitsa 25 no“E” mOshiingilisa otayi ka ninga opo oyendji ya kale itaya mono ompito yoku ninga omayindilo opo ya kutwe metanga lyopolisi.
Omumvo gwazi ko etanga lyegameno olya li lya kutu aakwiita aape ye li 1458, ihe oshikondo shenzulonkalo nuutonateli waanandholongo osha li sha kutu ashike aantu yeli 200.
Methano: Aapolisi taya yelwayelwa miilonga, yo taya patulula oompito oompe dhiilonga kaagundjuka.
