Okahokololoyolithi

kuMartin Negumbo /

Molwa ehumokomeho tali endelele nonkalo yomuntu otayi endele wo pamwe nethimbo.

Osha li ethimbo lyokomatango metitano sho aanambelewa yaali yaza kombelewa yehangano lyokutuma omawi mombepo ya li ye ya momukunda Oombale, nelalakano lyawo olya li okufutitha aakalimo ayehe mboka ye na ooradio dhomuzizimba (ooTV) momagumbo gawo.

Okufutitha okwali taku ende nawa lela okuza petameko nokaya li ya tsakanena nando omaipumo mumwe gasha.

Ihe sho ye li lwopokuzimbuka oye ya megumbo lyomusamane Kadhila Kalokwa.

Kadhila oye omupombolume, mba haku ti kuupombolume okwi igilila ko noku shi onkalo yako ayihe. Oyemu adha i ipyakidhila ta tala uudhano woongonyo koTV. Harry Simon Junior, okamatyona kanakulwa mukulu gwaMbaye oko kali taka topitha dhopomeho.

Kadhila yemwene kOmbaye okwa li ko a menekela ko ta longo moofaambulika dhoohi oomvula ndhiyaka Harry Simon yemwene a li ta dhenge aatiligane yaaEuropa osho wo Aayamerika.

Uudhano wa Harry Junior owali tawu nyanyudha shili. Yo oTV ndjika oya li onene noonkondo nongele omuntu ho popilile oto hala oku tya oyi thike pekende lyoshihauto lyokomeho muunene.

Ehokololo limwe lya kala po otaku tiwa anuwa tate Kadhila ka li e hole omukadhi gwe pethimbo a li emu na, ashike okwa li e hole okutala oTV ye ndjika esiku kehe. Sho osho shemu ningitha omupombolume.

“Onawa ngaa tatekulu we ga dhenga ngaa koradio yoye yomuzizimba?” osho omunambelewa a popitha. Aanambelewa mbaka oya li aagundjuka lela, ngiika opo ya zi mosikola.

“Ongiini? Ongweye lye wu li ngawo? Noweshi zilile peni? Weethelwa ngawo?” omusamane Kadhila ta pula, ta hala oku pona po oombwanawa sho ta piyaganekelwa uudhano we taweende po nawa.

“Aawe tate ombili, otse aanambelewa notu li hatu futitha aantu ayehe mbono ye na ooTV. Olisinisa ohayi kotha ashike oodola omathele gaali moTV kehe.”

“Osho yamati yakwetu,” Kadhila ta ti noku komona komutse. “Megumbo ndyono mwa zi, moka mu na aantu oyendji, oya futu ingapi?”

“Aawe tate, oya futa ashike omathele gaali ngoka ga uthwa shaashi oye na oTV yimwe,” osho omunambelewa omukwawo a yi mo.

“Noho ihatu tala kuuwindji waantu kuku. Ohatu tala uuwindji wooTV. Sho wu na ngeyi oTV yimwe oto futu owala omathele gaali gokuningululitha olisinisa yayo opo wu tsikile noku mona omauwanawa gokutala oTV yoye.”

“Ooo, hambaaaa … Osho lela ntsezi yandje,” Kadhila ta ti. “Onawa ano. Eewa, ngele olyo eyamukulo ndyono, ewanawa shili.

“Ihe ngame nduno sho ndi na eho limwe otandi futu ndishi ethele limwe?”

Aanambelewa oya li ya mwena po manga. Yo opo nee ye wete kutya omusamane oku na shili eho limwe.

“Aawe tatekulu,” gumwe ta yamukula. “Ihashi longo ngawo. Wu na eho limwe nenge wu na omeho hatano, oto futu ashike omathele gaali moTV kehe.”

“Aaye, aye, hasho,” Kadhila ta ti. “Omwa hala okunyokoma. Ethele otandi li gandja. Ngele hasho indeni, inandi hala odhindji nane. Otandi mu pe ethele e tandi mu lesha koombunda ngashiingeyi oshoka ngiika sho ihaamu tala kowindji waatali ohamu tala komeho gaatali.”

Kadhila Kalokwa okwa gandja ethele limwe, yo aamati oya taamba ngaa oshoka okwa li taku toko, yo kaya li ye na naanaa elombwelo lya yela okuza kombelewa kutya naya ninge ngiini muupyakadhi wa tya ngeyi.