Aagundjuka ye na uulema yaza kiitopolwa Ohangwena nOshikoto mboka ya li moshigongiilonga shokuya pa uuyelele nomapukululo kombinga yiinyangadhalwa ya pamba aagundjuka, oya li ya pula Minista gwAagundjuka, Omaudhano nEyakulo lyOshigwana kAagundjuka meme Agnes Tjongarero kutya epangelo otali ya ningile shike naanaa nayo opo ya yambuke po.
Oshigongiilonga osha li sha ningilwa mendiki lyedhina Ongwediva Rural Development Centre, mOngwediva, okuza momasiku 10 sigo 15 gaJuli.
Minista Tjongarero okwa li e ya okupatulula oshigongiilonga pambelewa momasiku 12 Juli.
Omugundjuka Moses Shikale a za kOhangwena naRosalia Shimpanda a za kOshikoto oyo ya li ya thikama oku thikitha omapulo gaagundjuka kuMinista.
Momapulo gawo omwa li epulo tali ti kutya epangelo otali ningi po shike kombinga yaagundjuka ye na uulema opo wo nayo ya mone oompito dhiilonga. Oya tumbula kondandalunde oompito ndhoka hadhi gandjwa koNational Youth Service ihe aagundjuka aanuulema oya indikwa oku mona oompito ndhoka.
Minista okwa li a ulike ina tseya ngele aagundjuka aanuulema ihaya pitikwa oku mona oompito dhomadheulo goNational Youth Service, ihe okwa yamukulwa kaanambelewa yamwe ya li po e taya ti oshinima shika osha li sha kundathanwa oomwedhi dha yi nokwa ningwa etokolo kutya aagundjuka aanuulema otaya ka kwatelwa mo nuumvo momadheulo goNational Youth Service.
Kombinga yoompito dhiilonga Minista okwa yamukula ta ti kutya uuministeli we ihawu gandja naanaa oompito dhiilonga ihe ohawu gandja omapukululo kaagundjuka opo ya vule oku mona oompito dhiilonga miikondo yiili noyiili moshilongo.
Methano: Moses Shikale naRosalia Shimpanda
