Uuministeli gwIikwapondje owa popya momushangwa wa pitithwa nena kutya epangelo lyaNamibia otali gandja ombili kOmukwaniilwa gUukwanyama Meekulu Martha Mwadinomho yaKristian Nelumbu molwashoka okwa li a kuutumbithwa koshipundi sha nathangwa poshituthifumviko shanakusa Hadino Hishongwa.
Nakusa Hishongwa okwa li a fumvikwa olyomakaya gaziko momawendo gomapendafule mEenhana.
Ihe omanyenyeto oga li ga uvika taga ti kutya aantu oya uva nayi sho Mwene gwoshilongo shaUkwanyama Meekulu Mwadinomho a li a kuutumbithwa koshipundi showala omanga aanenentu aakwanepangelo ya kuutumba kiipundi yondilo poshituthi shokuthindikila Hishongwa.
Hishongwa ngoka a li omukondjelimanguluko nokwa longo oomvula odhindji mepangelo, okwa kala elenga enene lyaUkwanyama osho wo omugandjimayele kOhamba Nelumbu konima sho a penzelwa miilonga yepangelo.
“Efumviko lyopapangelo olya li lya ningwa momawendo gomapendafule mEenhana momasiku 16 Sepetemba 2023 molwa nakusa Ambasada Hadino Timothy Hishongwa ngoka a li a longele oshigwana shaNamibia moondondo dha yooloka, osho wo a li omugandji mayele kOhamba Meekulu Martha Mwadinomho Kristian Nelumbu,” omukanda tagu popi ngaaka gwa shainwa komupevi minista Jenelly Matundu.
“Ihe mupyamunene iipundi kaya li ya longekidhwa nawa, nosha ningi opo Meekulu Mwadinomho a kuutumbithwe papuko koshipundi showala shoplastika peha lyokumu pa oshipundi shesimaneko ngaashi hashi ningwa.
“Onga epangelo osho wo Uuministeli wuna sha nomalandulathano [piituthi] yepangelo, otwa tala ko shi li oshinima sha puka noonkondo notatu gandja ombili kuMeekulu Mwadinomho osho wo aantu yOshitopolwa shaHangwena.”
Matundu okwa ti kutya epuko ndika itali ka endululwa we.
Methano: Meekulu Martha Mwadinomho Kristian yaNelumbu a kuutumba a tegama nOmupanguli Omukuluntu Peter Shivute ngoka a li a pewa oshipundi shesimaneko omanga Meekulu e li koshipundi showala.
