Oshikondo shelongo mOshitopolwa shaHangwena osha pewa epitikilo shi kale sha kuta aalongisikola ye li omugoyi omumvo tagu ya.
Shika osha popiwa komukuluntu gwoshikondo shelongo moshitopolwa shaHangwena tate Isak Hamatwi.
Hamatwi okwa li a popi ndhika pethimbo a li ta taamba omukandakemo gwaalongisikola moshitopolwa mboka kaye na iilonga.
Momukandakemo gwawo aalongisikola mbaka oya ti oya ekelwahi kepangelo nokoshikondo shalyo shelongo molwashoka epangelo inali hala okuya pa iilonga.
“Konyala oopelesenda 60 sigo 80 dhoosikola moshilongo muka odhi na ompumbwe yaalongi, ihe epangelo inali hala oku kuta aalongi,” taya ti ngawo momukandakemo yegu gandja kutate Hamatwi.
“Aalongi ye thike po 8,251 moNamibia mboka ya dheulwa pokati komimvo dho2017 sigo 2023 kaye na iilonga. Shika otashi ulike okwaahe na ko nasha nonkalo yokwaahe na iilonga moshilongo.
“Otwa hala kwaaha dheulwe we aalongisikola yoondondo dhelongo lyosikola yopevi muule woomvula ntano dhi li komeho, nenge sigo tuu aalongi ayehe mboka mongashingeyi kaye na iilonga ya mono iilonga.”
Momukandakemo omwa tumbulwa wo iinima oyindji, ngaashi shoka taya pula kutya iimaliwa yoomiliona 200 ya li ya uvanekwa kuPresidende Hage Geingob sho a popile kutya otayi ka longithwa mokukuta aalongi, oyi li peni?
Aalongisikola yaa na iilonga mbaka ya li ya gandja omukandakemo gwawo kombelewa ya tate Hamatwi oya li oyendji, ya pita po pethele limwe.
Oya li ano ya ningi ehololomadhiladhilo taya ende mondoolopa yEenhana sigo ya thiki pombelewa yatate Hamatwi.
Hamatwi okwa li a taamba omukandakemo gwawo e ta ti otegu tumine koombelewa oonene dhuuministeli welongo hoka oko iinkumungu ya tumbulwa momukandakemo gwawo tayi ka ungwaungwa nayo.
Methano: Tate Isak Hamatwi ta taamba omukandakemo gwaalongisikola taya pula iilonga.
