Ombaanga yoshilongo, Bank of Namibia, oya gandja omagano goshihauto kEtanga lyoPolisi yaNamibia ohela.
Sho a gandja oshihauto shika omukuluntuwiliki gwombaanga ndjika tate Johannes !Gawaxab okwa ti omagano ngaka otaga ulike ekwatathano ewanawa nolyakola pokati kombaanga osho wo opolisi, osho wo iilonga yuukumwe wawo mokukondjitha iimbuluma nuulingilingi moshilongo.
!Gawaxab okwa ti kutya etanga lyopolisi olya kwatha ombaanga opo yi kaleke po egameno lyoshimaliwa shoshilongo.
“Nena olyo esiku lyasimana momalalakano getu gokulalakanena iilonga iiwanawa notayi tula po egameno lyoshigwana,” !Gawaxab ta ti.
“Oshihauto shika otashi ka kwatha opolisi miilonga yawo yoku tula po ompango nelandulathano. Otashi ulike iilonga yetu yopamuhanga mokweetitha po omudhingoloko gu li nawa mekoko lyeliko lyoshigwana.”
Oshihauto shika otashi ka longithwa ketanga lyowina ndjoka lyedhina Special Reserve Force, ano etanga lyopolisi ndyoka olyo hali tumwa mpoka pwa nika uuhwapindi nomalugodhi.
Methano: Tate Johannes !Gawaxab naKomanda Joseph Shikongo taya paathana oshapi yohauto ndjoka ya pewa opolisi.
