Omwaalu gwa pitithwa kehangano lyokuwilika omahogololo gaNamibia oElectoral Commission of Namibia (ECN) otagu ti kutya oku thika momasiku 15 Juni aantu ye thike po 366,036 oya ndhindhilikwa ye ishangitha opo ya ka hogolole momahogololo taga ka kala ko muNovomba nuumvo.
Omaishangitho guukalata womahogololo ngoka ga tamekele momasiku 3 gaJuni otaga hulu momasiku gatatu gaAguste.
Mongashingeyi Khomas oye Oshitopolwa shoka she inyolitha aantu oyendji, ye li 77,098. Okwa landulwa kOhangwena ndjoka yi na aantu 40,122 mbo ye ishangitha nale, nOmusati ta landula ko e na aantu 35,804 ye ishangitha.
Iitopolwa mbyoka yi na aantu aashona ye ishangitha ongaashi Omaheke e na aantu ashike 10,242 oyo ye inyolitha uukalata womahogololo, Zambezi e na aantu 11,381, na Kunene e na aantu ashike 12,262 oyo ye ishangitha sigo oompaka.
“ECN okwa nyanyukwa sho ta tseyithile oshigwana ngeyi kutha okuza esiku omaishangitho ga tameka sigo onena ndjika Aanamibia ye thike po366,036 oye ishangitha ya ka ninge aahogololi moshilongo osho wo mboka ye li pondje yoshilongo,” omukuluntu gwiilonga yomahogololo tate Peter Shaama ta ti ngaaka momushangwa.
Shaama okwa ti aantu mboka ye ishangithila pondje yoshilongo oye li 721.
“Oshigwana otashi tseyithilwa kutya omaishangitho gaahogololi otaga tsikile oshilongo ashihe osho wo pomandiki gaakalelipo yoshilongo pondje yoshilongo sigo lyotango lyaAguste gwomumvo 2024, Omandaha sigo Olyomakaya kehe okuza pohetatu yongula sigo oheyali yokomatango,” Shaama ta ti.
“ECN ota indile opo aakwashigwana yaNamibia ayehe mboka ye na uuthemba ihe inaye ishangitha natango opo ye shi ninge meendelelo ngaashi tashi vulika.”
Methano: Tuyeni tu kiishangitheni, aakwashigwana mbaka yomoKunene taya lombwelwa.
