Aalimi yiikunino yoomboga niingumutulu oya li ya pandulwa molwa iilonga yawo e taya pewa oonzapo osho wo oshimaliwa.
Poshiithanene sha li ko momasiku 19 gomwedhi nguno pehala Epalela, ano Olushandja, pooha dhEtaka, mOshitopolwa shaMusati, ookapyoko miilonga mbika yiikunino oya li ya gongala ya zi kiitopolwa ayihe yoshilongo, ngaashi kOzambezi, Kavango, Karas, Oshikoto, Otjozondjupa, nosho tuu.
Oshiithanene shegandjo lyepandulo nesimaneko kaaniikunino yaNamibia osha li sha longekidhwa kehangano lyedhina Namibian Agronomic Board (NAB) ndyoka olyo li na oshinakugwanithwa shoku yambula po oshikondo shika shoomboga niingumutulu osho wo iilya tayi longwa moshilongo.
Poshiithanene mpoka pwa li Gavena gwaMusati tate Erginus Endjala osho wo Gavena gwaShana tate Elia Irimari, nopwa li wo omuwiliki takwathele gwelelo lyaUukolonkadhi tate Malakia Shoombe nomalenga ge.
Methano: Meme Anni Matias aza kOshikoto okwa li a sindana onga omweetipo gwomadhiladhilo omape miilonga yokulonga oshikunino she gwokomvula, nokwa pewa onzapo osho wo oshimaliwa shoN$30,000.
