MTC ota kala ta kwatha oshigwana moku nongeka okanona okaNamibia sigo taka mana eyilongo lyako.
Ndhika odha popiwa kutate John Ekongo ngoka oye omunambelewa e na sha niilonga yegandjo lyomauyelele mehangano hali gandja omakwatakanitho gopangodhi dhopeke oMobile Telecommunications (MTC).
Ekongo okwa li a popi ndhika ohela peegululo lyendiki lyokuputudha aanona yoomvula oonshona ndyoka lya tungwa mOnawa mOshakati.
Endiki ndino olya tungwa koshimaliwa shi thike poN$800,000 sha gandjwa kuMTC.
“Okwa kala oongeshefa odhindji tadhi ningi oshimaliwa moshigwana, ihe kadhi gandja sha koshigwana,” Ekongo ta ti. “Tse otwa tokola oku tungitha oosikola mbali miitopolwa ayihe 14 yaNamibia.
“Shika otatu shi ningi oshoka shino osho oshilongo shetu, nongele tashi yambuka po itashi ningwa kuyalwe ihe okutse yene. Ngele otatu vulu, natu shi ningeni.”
Ekongo okwa ti wo kutya MTC oku na po opolohalama yokukwatha aanasikola mboka opo ya zi kiiputudhilo yelongo lyopombanda opo ya mone ontseyo yiilonga.
“Otu na aayilongi ye li 300 mboka opo ya mana omayilongo gawo, notwe ya tulitha miilonga miikondo yi ili nomahangano gi ili, ihe otse tatu ya futu oshimaliwa shi thike poN$3,000 mukehe gumwe uule woomwedhi hamano.”
Ekandjo okwa pandula ehangano lyedhina Development Workshop Namibia ndyoka lya gandja omakwatho gomayele niipumbiwa yilwe sho endiki ndika lya li tali tungwa mOnawa. Okwa pandula wo Elelo lyOndoolopa yaShakati sho lya gandja evi mpoka pwa tungwa endiki ndino.
Methano: John Ekongo ta popitha mboka ya li ya gongala mOnawa.
