Omupresidente gwaNamibia Meme Netumbo Nandi-Ndaitwah ota talele po iilongo yokuumbugantu waAfrika, ano iilongo yaSADC, opo a popithe aashiinda sho ngashingeyi oye omuleli gwoshilongo, omanga inaa ya kondje yiilongo.
Nandi-Ndaitwah ngoka a ningi omuleli gwaNamibia momasiku 21 Maalitsa nuumvo, okwa li a kutha olweendo lwe lwotango oku ya pondje yoshilongo sho a talele po Angola iiwike iyali yapiti.
Okwali a yi ishewe koBotswana oshiwike shaziko, e tayi koZambia omasiku gaziko, nokwa yi wo kuMozambique uunambo.
Okwali a taambwa ko kaaleli yiilongo mbika Angola, Botswana, Zambia naMozambigue.
MoMaputo shaMozambigue Nandi-Ndaitwah okwali a popi a ti okwa nyanyukwa okugalukila mo moshilongo shika ngashingeyi e li omuleli gwoshilongo she, netalelopo lye olyondjokonona.
Nokwa ti kutya Mozambigue oye oshilongo shimwe sha li sha gandja omakwatho mekondjelomanguluko lyaNamibia ngaashi okutaamba oontauki noku gandja oompito dhokwiilonga kaantu ya li ya tauka koNamibia pethimbo ndiyaka.
Nandi-Ndaitwah okwa li a taambwa megumbo lyepangelo komupresidente gwaMozambique Daniel Chapo, noya li ya uvathana kutya ekwatathano pokati kaNamibia naMozambique lyopapolotika nolyopadiplomate olya kola, notaku pumbiwa ashike opo elongelokumwe lyopaliko li yambulwe po.
Methano: Presidente gwaMozambique Daniel Chapo taya kundathana naPresidente gwaNamibia Netumbo Nandi-Ndaitwah moMaputo.
