Aanambelewa ye thike pomilongo ntano yiikondo ya yooloka mOshitopolwa shaShana oya gongala nena opo ya laleke noku pandula gavena omukulu gwoshitopolwa tate Elia Irimari.
Irimari ngoka a li gavena gwoshitopolwa uule woomvula ntano noomwedhi hamano okwa li a pingenwa po miilonga kutate Hofni Iipinge ngoka a li u ulikwa oye a ninge gavena omupe kuPresidende Netumbo Nandi-Ndaitwah iiwike iyali yapiti.
Mboka ya gongala nena omwa li mwa kwatelwa gavena omupe tate Iipinge, meya gwaShakati tate Leonard Hango, meya gwaNgwediva tate Taarah Shalyefu, omunashipundi gwelelo lyoshitopolwa shaShana tate Andreas Uutoni, ookansela dhoshitopolwa shaShana ngaashi kansela Joseph Mupetami, kansela Andreas Amundjindi, kansela Timotheus Shivute, kansela Adolf Uunona, osho wo aanambelewa yoshikondo shezulonkalo, aakalelipo yoshikondo shoongeshefa, osho wo aakalelipo yiikondo yilwe.
Aapambele yatate Irimari oya li wo ya thika poshituthi shino sha ningilwa mOshandira Lodge mOshakati.
Aapopi oya li ya pandula Irimari molwa iilonga mbyoka e yi longo nondjungu noneitulomo pethimbo a kala miilonga yuugavena.
Irimari, ngoka a ti oku na epya ngashiingeyi nota ka ninga omunafaalama, okwa pewa omagano ogendji kaantu mboka ya li ya gongala. Miigandjwa omwa kwatelwa iilongitho yomomapya osho wo iizalomwa niinima oyindji.
Methano: Tate Elia Irimari ta pewa omagano.
