Ku Marx Itamalo /
Omahala ogendji miitopolwa Oshikoto, Ohangwena, Oshana osho wo Omusati oya li ya mono omuloka omwaanawa okuza petameko lyoshiwike shika.
Omuloka nguka ogwa nyanyudha aanafaalama oyendji, na ogweeta einekelo kutya omumvo ta gu ya aanafaalama oyendji kUumbangalantu woshilongo na palwe otaya ka mona eteyo ewanawa.
Okuza mehuliloshiwike twa zi, iitopolwa ayihe kUumbangalantu woshilongo oya li ya mono omvula yepoola. Omvula ndjika oyo yotango yuunene mbuka ta yi loko kiitopolwa mbika okuza poomwedhi dhokwenye.
Pethimbo lyoshinyolwa shika tashi nyanyangidhwa, egulu alihe olya li ta li monika natango niikogo yomvula.
Onzonkundana ndjika oya li ya yi moonkundathana dhopangodhi naakalimo ya yooloka kiitopolwa yokonooli ngaashi Oshikoto, Ohangwena, Oshana nOmusati ya gandje omadhiladhilo gawo kombinga yomuloka gwoshiwike shika.
Matheus Nekongo, ngoka eli omulongisikola nomunafaalama mOshikoto okwa lombwele onzonkundana ndjika kutya pakutala, ota ku kala omuloka omwaanawa nuumvo.
“Ngele oto tala elandulathano lyomvula kuyele omwedhi nguka, ota li ulike twa taalela omuloka omwaanawa,” Nekongo ta ti.
“Kandiwete nokuli omvula ta yi ka shuna we, kakele muJanuali moka aluhe hatu mono oluteni ngaashi sha kala shito.”
Maria Henghali, omulongipya momukunda Odibo mOhagwena okwa lombwele Omutumwa Online kutya okwa nyanyukwa molwa omuloka gwoshiwike shika, no ta tameke oku pululitha epya lye.
“Otwa kala tu na omalimbililo kombinga yoku pulula. Katwali nande tatu vulu oku pulula omanga evi lya kukuta. Otwa li twa limbililwa. Ashike ngashingeyi sha landula omuloka nguka, omalimbililo katu gana we, na ota tu tameke mbala ngaashi ta shi vulika,” Henghali ta ti ngaaka.
Omuloka nguka ogweeta wo eimemeho kooyene yomambakumbaku gokupulula konooli yoshilongo.
Jackson Shiweda, gumwe gwomooyene yomambakumbaku gokupulula. Omukalimo nguka gwomomukunda Olunghono mOshikango moshitopolwa Ohangwena okwa lombwele onzonkundana ndjika metitatu kutya aluhe omuloka omwaanawa oha gu eta ompito yiilonga kuye nokwiimonena othewa.
“Ito vulu oku longa sha uuna pwaana oshitosi. Onkene ndjika oyo ompito ombwanawa kutse ooyene yomambakumbaku naapululi opo tu ye miilonga,” Shiweda osho a popi ngaaka.
Pokati mpoka ombelewa onene yetengeneko lyombepo moshilongo oya tseyitha kutya omvula ndjoka ya loko okuza mehuliloshiwike twa zi, okwa tegelelwa yi kale ta yi pula komeho, na ota shi vulika yikeete efundja kiitopolwa yimwe.
Methano: Egulu otali monika ngeyi lyakogopala.
