Natu hingeni kashona yakwetu
KuVictor Angula|
Ngaashi ngaa ngeyi shu uka kehulilo lyomvula, osho ngaa iiponga yomoondjila dhaNamibia nayo tayi indjipala.
Uupyakadhi mbuka owo oshinima shonale. Nonando nomokati komvula iiponga ohayi holoka, ihe kehulilo lyomvula unene oko ngaa hayi londo.
Aantu otaya kanitha oomwenyo, mba taya lemana, omanga omaliko taga kana sho iihauto tayi kandoma ngaaka.
Olundji iiponga yomoondjila ohayi holoka molwa aantu taya hingi nayi. Aantu taya hingilile. Nando owo ngaa uusiku aantu otaya hingilile owala, ku shi kutya omuntu ota endelele u uka peni.
Oto endelele wu uka megulu, nenge omoheli ano?
Yakwetu, natu hingeni kashona. Okuhinga kashona, u ka thike nethimbo, oshi vulithe omuntu to endelele ihe to kala inoo thika ko we nkoka wa li to yi. Ngele owa sitamba nenge wa sitambwa opo to kala mpoka uule woowili popate mpoka, nenge wu ka kale manga moshipangelo omasiku nenge iiwike.
Okulata etata lyowili oshi vulithe oku shunithwa monima uule woomwedhi omilongo ndatu nahamano (oomvula ndatu to longo ishewe wu lande ohauto yilwe).
Ongele ino hulitha. Mosheendelela omuntu oto vulu oku kanithila mo omwenyo.
Yo aantu yamwe ohaya hingi ya fa inaya pwa nawa. Omuntu ta sineya a fa omupwidhi ta undula okatololi moShopulaita. Aaye, nashi mone ehulilo.
– Victor Angula oye omukuluntupitithi gwoshikundaneki komalungula Omutumwa.
