Opolisi oya lopota kutya aalumentu yaali oya hulitha sho ye ikutha oomwenyo komaandelo goshiwike shaziko, gumwe okoSwakopo nomukwawo omOvenduka.
Momasiku gahamano omulumentu omunamimvo 24 okwa lopotwa olutu lwe lwa adhika mombete ye kuyina lu na oshilalo shondjembo montulo. Yina yanakusa oye a li a mono omwana a sila ngeyi mondunda pethimbo lyotundi ontihamano komatango. Ondjembo oya adhika pooha dhe ihe inapu monika okambapila kasha kanyolwa.
Olopota yopolisi oya li ishewe ya popi kutya molukanda lwedhina DRC mOswakopo, omulumentu gwoomvula 43 okwa li a adhika i imangeleka monduna, sha ningwa momasiku gaheyali pethimbo lyomulongo guusiku.
Kakele komaidhipago opolisi oya lopota wo kutya omulumentu omunamimvo 45 okwa li olutu lwe lwa adhika pooha dhopate kofalama yedhina Farm Jobos mOshiwarongo. Okwa hokololwa kutya omulumentu okwa li a si konima sho a ponokelwa koonyushi.
Moshiningwanima shilwe omukiintu gwoomvula 40 okwa adhika a hulithila mondunda ye, lwanima sho a li a popi kutya ota ehema mepunda.
Methano: Opolisi yaNamibia oyo ya lopota ngeyi.
