Iipindi nayi pule komeho
Ku Martin Negumbo |
Nonande eliko lyoshilongo lya gumwa nayi konkalo ndjika yomukithi gwoCovid-19, iipindi itayi pumbwa nande oku idhimbikwa.
Yo aanangeshefa inaya sa uunye uuna ye wete iipindi yawo itayi ende nawa nenge ye wete oshimaliwa tashi ya kuyo nuudhigu.
Omukalo gokungeshefa ogo gumwe gomoonkalo ndhoka hadhi yambula po eliko noku yela oonkalamwenyo dhaakwashigwana moshilongo shetu.
Aanangeshefa oyendji oya tameka oongeshefa dhawo molwa omalalakano gi ili nogi ili ngaashi oku kandula po onkalo yoluhepo, yokwaahe na iilonga, nenge oku gandja omayakulo gopangeshefa moshigwana.
Ano nande ku kale omashongo ge etwa komukithi gokorona aanangeshefa naya pule owala komeho nomukumo mokukondjela omalalakano gawo. Naya tsikile nuudhiginini e taya longo ya mana mo ngaashi ya kala haye shi ningi shito.
Otandi kunkilile wo aanangeshefa yaaha kale ye ninathane oondumbo uuna yakwawo tayeshi enditha nawa. Oshoka uuna onkalo tayi ya nawa neliko tali koko ta li endelele omutango ota vulu okuya gwa hugunina, nogwa hugunina nenge ngoka e li konima ota vulu okuya puutago.
Nena olyamukweni, ihe ngula olyoye.
Shika otashi endele pamwe nuuna twa landula oondjodhi dhetu nomalalakano getu goongeshefa, nonando aanangeshefa yamwe ye li monkugo yi na onkambe uuna tashi ya koku mona oonzo dhiimaliwa yoku kokeka oongeshefa dhawo.
Oshilongo osha patuluka ngashingeyi, naantu oya manguluka oku landitha nokuhalitha iipindi yawo shampa ashike omilandu dhokukandeka omukithi gwokorona tadhi iyuthwa kudho.
Ano uumasika nawu zalwe ethimbo kehe omuntu to landitha momapandaanda nenge momaalaka.
Omukithi natu kaleni twegu tila, ihe komeya ihaku itekwa. Iipindi nayi pule komeho.
