Ombaanga yuunamapya nuuniimuna (Agribank) oya li ya ningi ethigathanopo muunamapya nuuniimuna tali gandja oshimaliwa kwaamboka ya tuma omathano omawanawa giilonga yawo.
Methigathanopo otamu yiwa paku tuma ethano weli ithaneka ngoye mwene (selfie) to ulike ongeshefa yoye yomoshimpungu shuunamapya nenge uuniimuna.
Ethigathanopo olya tamekele muKotoba gwomumvo 2020 notali hulu muApilili gwo2021.
Aakiintu oshowo aagundjuka yoomvula okuza 18 sigo 35 oyo ya pitikwa oku ya mo methigathanopo.
Hileni Namwandi gwomimvo 26 gwomomukunda Omuntele mOshitopolwa shaShikoto oye a sindana lwotango, a mono okavoutja kongushu yoshimaliwa shi thike poN$10,000.
Namwandi oha muna iingulu noondjuhwa, nokwa tameke wo okakunino komatama noomboga. Sho a sindana ngeyi, okwa dhiladhila opo a longithe oshimaliwa shoka a sindana a lande oombuto niipumbiwa yilwe yoshikunino.
Methano: Hileni Namwandi e li mepya lyaandjawo.
