Bipa a longekida omauliko oipindi
Endiki hali ungaunga noinima inasha noumwene weengeshefa osho yo oindulukomwa ledina Business and Intellectual Property Agency (Bipa) okwali la longekida omauliko oipindi ovanangeshefa vanini mOvenduka ongela.
Onghela (30 Apilili) okwali efiku lopaunyuni lokudimbulukwa eameno loumwene woindulukomwa (intellectual property).
Keshe omunhu we ya po nediladilo lonhumba olo la etifa sha shi ndulukwe po oshikando shotetetete kombada yedu ou na oufemba opo ediladilo loye olo li kale la shiivika kwaaveshe kutya oloye, nakape na umwe ta dulu oku nduluka po oinima yoludi olo pehe na epitikilo loye.
Bipa oye nee e na oshinakuwanifwa shoku yandja omikanda tadi shilipaleke kutya ediladilo loku tota po ongeshefa yonhumba ile oshindulukomwa shonhumba ola ngadi ile ola nhumba oo a pewa omukanda oo.
Mefano: Otamu monika ovanambelewa vaBipa tava ende momauliko oipindi oo a ningilwe onghela.
