Onkundana tayi zilile moshishiindalongo South Afrika otayi ti aantu ya lopotwa ya sa molwa iikolokosha tayi ningwa moshilongo shoka medhina lyomupresidende omukulu Jacob Zuma oga thika paantu 72.

Ihe oolopota dhimwe odha ti omaso oga thika po 90.

Nonando uunambo Omupresidende gwaSouth Afrika Cyril Ramaphosa okwa li a popya ta ti aakwiita yetanga lyegameno otaya ka tumwa ya ka kwathe aapolisi kiitopolwa shaKwaZulu-Natal noshaGauteng hoka oko taku ningwa omakuyunguto, iikolokosha oya lopotwa tayi yi komeho sigo onena.

Omusamane Zuma okwa li a igandja kopolisi a ka patelwe mondholongo etitatu lyoshiwike sha zi ko konima sho Ompangu Onenenene yoshilongo shoka ya li yemu pe etokolo lyoku kala mondholongo uule woomwedhi 15 molwashoka a tindi oku ya a gandje uumbangi moshipotha tashi kundathana oombumbo niiningwanima yoolungaitapula ya ningilwe pethimbo Zuma a li oye Omupresidende gwoshilongo.

Aayambidhidhi yaZuma oya tameke oku piyaganeka ombili sho Zuma a tameke egeelo lye mondholongo.

Aantu oya fike oohauto nomatungo, noku iteyela moositola, notaya ti otaya pula komeho niikolokosha sigo omusamane Zuma a mangululwa.

Methano: Omupresidende-kwali gwaSouth Afrika, Jacob Gedleyihlekisa Zuma (ethano ku biography.com).