Osipana yaNamibia ndjoka tayi kutha ombinga momaudhano ge li ko muTokyo shaJapan goOlympics, otayi galukile kegumbo metiyali lyoshiwike tashi ya.

Momushangwa gwapitithwa kUuministeli wOmaudhano, Aanyasha, nIilonga yOshigwana ogwa ti ngeyi:

“Christine Mboma okwa ningi ondjokonona, sho a ningi omukiintu gwotango Omunamibia ta sindana omedalia koOlympics. Ependafule lyetu olya sindana oshisiliveli mondapo yoometa 200 koOlympics yaTokyo. Pamwe nomanyakwa omakwawo gaNamibia, ota galukile kegumbo metiyali, lyo10 gaAguste powili 12 ya pita 45, pokapale koHosea Kutako International Airport.

“Epangelo otali longekidha oshituthi shehambelelo lyawo sho taya thiki. Poshituthi shehambelelo pokapale otapu ka kala ashike aantu mboka ya hiywa, shi ikwatelela komilandu dhoCovid-19. Uuyelele wu na sha nekuthombinga lyaakwashigwana moshituthi shehambelelo otawu ka tseyithwa nale.”

Mboma okwa ningi Omunamibia omutiyali ta sindana omedalia yoOlympics okuza sho Frank Fredericks a li a sindana oomedalia dhoshisiliveli mo1992 nomo1996 koOlympic yoomvula ndhoka.

Helalia Johannes ngoka a matuka ondapo yomarathona ohela okwa longo wo nawa sho a thiki omutimulongo nagumwe muudhano wokumatuka oshinano oshile shookilometa 42, eshi matuka muule wethimbo lyoowili mbali netata nomunute gumwe noosekonde omilongo mbali nambali (2:31:22).

Methano: Christine Mboma konima sho a pewa omedalia ye yoshisiliveli.