Omukwaniilwa gwaNdonga Nehale lyaMpingana ngoka a li a pangele oshitopolwa shuuzilo woshilongo pethimbo lyomimvo dhonale okwa tulilwa po edhimbuluko tali kalelele nolyopashinanena pehala lyaatalelipo lyedhina Namutuni, moshikunino shiinamwenyo shEtosha.
Amutuni, ndjoka ngashingeyi oyo Onamutuni, yi li mUushimba, oya li oshitopolwa shAandonga pethimbo Nehale a li omukwaniilwa gwOndonga kuuzilo omanga omumwayina Kambonde kaMpingana a li omukwaniilwa gwaNdonga yokuuninginino.
PuAmutuni mpoka opwa li pwa holoka olugodhi momasiku 28 Januali 1904 sho aakwiita yaNehale ya ponokele Aandowishi mboka ya li ya tungu po ohote ndjoka yaNamutuni.
Olyomakaya gaziko aanenentu yaza kOnooli osho wo kUushimba mwa kwatelwa Omukwaniilwa gwaNdonga Tate Fillemon Shuumbwa Nangolo, Omukokolipresidende Sam Nujoma, osho wo Omupresidende Hage Geingob, naantu wo oyendji, oya li ya tsakanene puAmutuni mpoka e taya siikulula emanya lyedhimbuluko molwa uupenda waNehale sho a kondjitha aakolonyeki.
“Ombinzi yomapendafule getu ngoka ga sila momalugodhi oshilongo ashihe, okuza komalugodhi gaHornkranz, Hamakari, Oshatotwa, Amutuni gomanenge, Omugulugwombashe, Kasinga osho wo galwe, nagetu pe omukumo ongaakwashigwana yethimbo lyonena tu kondjeni twa manamo molugodhi lwokukondjitha oluhepo,” Presidende Geingob ta ti.
Geingob oye a li a gandja oshipopiwa sha simana shesiku.
“Pethimbo ndika, ongaashi naanaa ependafule Nehale ngoka a li a kondjele muka momasilu gaAmutuni ethelemimvo lyayi, natu kuthe ko omukumo e tatu tsikile olugodhi lwetu mokuyambulapo oshilongo shetu.
“Pethimbo ndika, ongaashi mboka yetu tetekele ya li yeshi ningi, natu kondjeni ongaamati naakadhona ya hangana mEgumbo lyaNamibia, natu puleni komeho twa yelutha onyika yelongelokumwe, uukwawowanankali nuuyuuki kukehegumwe Omunamibia a tyapule oshiimati shemanguluko lyetu.”
Methano: Omukwaniilwa gwaNdonga Tate Fillemon Shuumbwa Nangolo osho wo Omupresidende gwaNamibia Dr Hage Geingob taya siikulula emanya lyedhimbuluko lyependafule Nehale lyaMpingana poNamutuni.
