Minista gwOmayambulopo gOondoolopa nOmahala gokOmikunda tate Erastus Uutoni olyomakaya ga zi ko okwa li a patulula pambelewa omagumbo ga tungwa kehangano lyedhina Shack Dwellers Federation.
Omagumbo ngaka ge li 195 oga tungwa molukalwa olupe lwomagumbo lwedhina Onawa mOshakati.
Shack Dwellers Federation olyo ehangano hali kwatha aakwashigwana mboka haya kala momagumbo goombashu ihe oye iyunganeka muungundu opo ya mone omikuli dhokutunga omagumbo gawo gomakuma.
Minista Uutoni okwa ti epangelo oku pitila muuministeli we olya gandja oshimaliwa shi thike poomiliona 10 omumvo gwa za ko osho wo nuumvo shi longithwe mokutunga omagumbo gaFederation.
Kakele kelelondoolopa lyaShakati ndyoka lya gandja oopolota dhomagumbo ngaka oshali, omahanganongeshefa ngaashi Pupkewitz naFNB oga gandja wo oshimaliwa shi thike pomiliona yimwe kehe gumwe, omanga Ohorongo Cement ya gandja omayuvi omathele gatano.
“Mbika oyo iizemo yiilonga yetweni,” Minista Uutoni ta popi poshituthi shepatululo lyomagumbo. “Kapu na ngoka ta ka za kumwe kwi ili okuyambulapo oshilongo shetu. Otu na okushi ningeni tse yene noshishona shoka tu na po.
“Otandi mu pandula sho mwa longo ngeyi ne iilyo yoFederation mu tunge omagumbo geni. Elelo lyondoolopa yaShakati otandi li pandula wo. Otamu pitilile ngashiingeyi oondoolopa odhindji. Oondoolopa dhilwe nadhi kuthe oshiholelwa kune.”
Mayola gOndoolopa yaShakati tate Leonard Hango okwa popi poshituthi opotuu mpoka ta ti oku na ondjodhi opo mOshakati mwaa kale we omalukalwa ga tungwa omagumbo goombashu.
“Ohashi ehameke ndje komutima ngele tandi tala kaakwashigwana yetu ye li momagumbo goombashu, yo yaa na olusheno, omeya, uundjugo, osho wo omakwatho gasimana galwe,” Hango ta ti.
Mokati kaamboka ya mona omagumbo ye li 195 omu na yane mboka taya lumbu nuulema.
Methano: Minista Erastus Uutoni ota egulula egumbo lyatate Temus Festus ngoka e li mokatemba.
