OSwapo Party Youth League (SPYL) oya ti sho tayi ka ninga oshigongi shayo oshinene (okongressa) muAguste nuumvo otayi ka tula po omuwiliki gwayo a ye momahogololo kee nasha omukondjithi.
SPYL ndjoka oyo ewawa lyaagundjuka yongundu Swapo, ndyoka tali wilikwa kuEphraim Nekongo, oya ti wo omupevi gwaNekongo ngoka oye Christine Haindaka-Sikongo, naye ita ka kala e na omukondjithi pethimbo lyomahogololo gaaleli aape.
“Moshigongi ngundumutima (central committee) sha li ko momasiku 30 Apilili 2022, omwa ningwa wo omatokolo galwe, ngaashi ndyoka ta li ti kutya naku kale okongressa ontiyali yoSwapo Party Pioneers Movement (SPPM) pethimbo lyefudho lyosikola muJuni nuumvo, omanga okongressa ontiheyali yoSPYL tayi ka kala ko momasiku 17 sigo 20 gaAguste nuumvo,” Gerson Dumeni ngoka oye amushanga gomauyelele moSPYL osho a ti ngawo.
“OSPYL otayi ulike uukumwe wa kola mokati kiilyo yayo.
“SPYL otayi yi mondjila yuuka kokongressa hoka taku ka kundathanwa iinima ya pamba uuhupilo waakwashigwana yetu, e taku ka ningwa omatokolo ngoka taga ka kwatha opo ewiliko lyoshilongo li tale kiinima ngaashi oompito dhiilonga dhaagundjuka, okulela oshigwana nawa, osho wo oku pukulula uuhupilo woshigwana.”
Methano: Omuwiliki gwoSPYL Ephraim Tuhadeleni Nekongo.
