Oshiketha shopenzela yaaniilonga yomiikondo yepangelo (GIPF) otashi ti oshi itula mo shili moonkambadhala dhoku kondjitha uulingilingi nomahalo gaaniilonga yoshiketha mboka taya lungu yo taya itapula.
Ndhika odha popiwa nomuthindo ohela mOvenduka poshigongi shokutseyitha omukalo omupe gwa tulwa po kuGIPF opo aakwashigwana ya vule okulopota omainyengo agehe ga nika uulingilingi maaniilonga yaGIPF.
Oshigongi mpoka pwa tseyithwa omukalo nguka omupe opwa li pwa kala Minista gUuyuuki meme Yvonne Dausab, Omupevikuluntu gwEtanga lyoPolisi meme Anna-Marie Nainda, Ombudsman gwaNamibia tate Basilius Dyakugha, Okuluntu gwaAnti Corruption tate Paulus Noa, osho wo aanenentu yalwe.
Etseyitho lyoonkambadhala ndhika dhoku kondjitha uulingilingi waaniilonga olya ningwa konima owala yomasiku gontumba sho aaniilonga yaali yaGIPF ya li ya holoka mompangu sho ya patululilwa oshipotha shoku kengelela shi thike poomiliona omulongo naheyali.
Omapopyo kutya opu na aaniilonga yaGIPF ya longekidha omaindilo goshimaliwa shi ze moGIPF anuwa oshoothigwa tadhi ilongo kiiputudhilo yelongo lyopombanda ihe iimaliwa oye yi tula mooakaunda dhawo yene, oga li ge ya po sho Dr Job Amupanda e shi pititha komalungula omwedhi gwa zi ko.
GIPF okwa li a yamukula meendelelo ta ti aaniilonga mboka taya fekelelwa uulingilingi mbuka oya kuthwa mo miilonga manga opo ku ningwe omakonaakono.
Oshiwike sha zi ko mbaka yaali oya li ya mangwa po nduno e taya holoka mompangu. Nomadhina gawo ogo Martin Eugene Smith gwoomvula 34 osho wo Fabiola Aoses gwoomvula 44.
“GIPF oku na iilyo yi thike po 145 000, noku na omaliko gongushu yi thike poobiliona 140,” omukuluntuwiliki gwaGIPF tate David Nuyoma ta popi.
“Etseyitho ndika otali ulike nkene sha simana kiilyo yetu opo tu kondjitheni uulingilingi. GIPF oha futu oshimaliwa shi thike poomiliona N$300 nasha omwedhi kehe kiilyo mbyoka yi li mopenzela, oothigwa osho wo yalwe mboka haya mono omakwatho gaza muGIPF.
“Ano osha simana nosha simanenena opo tu kaleni uupathi e tatu kondjitha kehe ngoka a hala oku ikuthila mo moshikwiila shaantu.”
Methano: Yamwe yomaaniilonga yaGIPF mboka ya li po petseyitho lyomukalo omupe gwoku kondjitha uulingilingi woku lunga-itapula maaniilonga.
