Ongulohi yohela ehangano lyedhina Old Mutual olya li lya hiya yamwe yomaasimanekwakastoma yehangano opo ya kale pamwe puulalelo wowina mpoka ya popi wo nkene ehangano ndika tali longo oku kwashilipaleka omauwanawa gaakwashigwana.
Ehuku lyiipopiwa olyali olyo oku kala wa kotoka opo wu kwashilipaleke onakuyiwa yoye noyaapambele yoye uunandoka wa kulupa nenge wa hulu ko.
Mboka ya li ya hiywa ye thike lwopaantu omilongo ndatu oya li ya za mOshakati, Ongwediva, Ondangwa osho wo omahala gopopepi, nomwa li mwa kwatelwa aanambelewa yomOmbelewa yaGavena gwaShana, aanambelewa yaNORED, aanambelewa yElelo lyaKahao, aanambelewa yomalelo gopamuthigululwakalo noshotuu.
Omunambelewa gwehangano ndika tate Ndangi Katoma moshipopiwa she okwa ti oyendji yomaantu yepipi lye oya koneka nawa nkene uukwatya waOld Mutual wa kala wa tseyika okuza pethimbo Namibia ina manguluka sho kwali hali tangwa onga “ehangano ekulukulu enankondonkondo”.
Methano: Meme Mignon Du Preez ngoka oye omukuluntu gwoshikondo shomapindiko mehangano ndika oye a li a taamba ko aantu.
