Ovakwashiwana vomunghoko wOvayelele, ovanhu voludi laNekai laShikuti, ovo vamwe vadjuu neenghono oku eta pomufika wonghalamwenyo yopashinanena.
Edi oda popiwa kuGavena waHangwena tate Walde Natangwe Ndevashiya, ta ti epangelo otali kondjo ngoo ashike kashipu.
Ndevashiya okwa li ta nyamukula epulo lomukwashiwana umwe kwali a pula kutya epangelo otali ningi po shike naana opo ovakwashiwana Ovakwa-nghala va yambuke po vo vadje mo moluhepo.
“Ngeenge Ovayelele inava hala oku lunduluka … osha fa ashike omunhu ta findile onghambe mediva yo inai hala oku nwa.
“Omafiku ngoo aa okwali handi popi nomukulunhu wendiki lomadeulo ovakwaita kOkahandja, shi na sha novanhu vetu Ovayelele ovo tava deulilwa oukwaita. Okwa ti oupyakadi u li po, ovanhu nge va pewa okamhito kokushuna komaumbo ihava alukile ko vali keekamba doukwaita.
“Nomonakudiwa Ovasoomi navo ovakendabalele okuva ningila eepoloyeka dexumokomesho lavo, ashike ovanyengwa.
“Epangelo otali kendabala ngoo natango okuva eta pondodo yexumokomesho laaveshe moshiwana nopamaxupilo. Hatu kendabala okuva pa omadeulo, okuva ningila eepoloyeka, osho yo okushunifa pedu oipumbiwa oyo ve na okuwanifa po nge taku ningwa omaindilo oilonga yomoPolifi nOukwaita.”
Gavena okwa li ta popi poshiifanene opo kwali a yandja oshipopiwa shaye shokomudo, osho haku tiwa oState of the Region Address, omafiku aya mEenhana.
Mefano: Gavena waHangwena Walde Ndevashiya, osho yoo oludi lOvananyule.
