Omauliko giipindi gokomumvo gedhina Ongwediva Annual Trade Fair nuumvo oga ekela mo okatalaka mondambo oko ka sindanwe po komuntu ngoka ta ka tuma okatumwalaka okanelago.
Okatalaka hano taka sindanwa okatseyithwa nena mendiki lyomauliko giipindi yokomumvo mOngwediva, mpoka meme Rebekka Hidulika ngoka oye omunashipundi gwomauliko ngano gaNgwediva a ti kutya shika osho omukalo gwoku shuna moshigwana molwa eyambidhidho ndyoka oshigwana sha kala tashi gandja momukokomoko gwoomvula omauliko ngaka giipindi ga kala taga ningwa.
“Nasho osho wo egongelo lyoshimaliwa shi ka kwathe momalongekidho gomauliko giipindi yetu yaNgwediva oshoka ohashi pula oshimaliwa oshindji,” meme Hidulika ta ti.
Omuwiliki gwongeshefa hayi landitha iihauto yedhina Auas Motors, tate Dale Diergaardt, okwa ti okatalaka oka landwa kondando ya teyelwa kongolo molwashoka oya hala oku gandja eyambidhidho komauliko giipindi yonuumvo.
Omathigathanopo gokusindana po okatalaka oga tameka nale notaga hulu mo30 Aguste nuumvo.
Methano: Tate Dale Diergaardt nameme Rebekka Hidulika taya ulike okatalaka.
