Momasiku 21 gaMaalitsa go1990, mokapale okanene mOvenduka, omukalelipo gwaSouth Afrika moNamibia omusamane Louis Pienaar okwa li a saluta lwahugunina epandela lyoshilongo shawo South Afrika, e ta gandja elombwelo opo epandela ndika li londoloke.
Sho epandela lya kuluka, Pienaar okwa shuna monima e ta thikama mpoka pu na ongundu yaantu, mwa kwatelwa aanenentu yaza kiilongo niilongo.
Ye omusamane Sam Nujoma okwa yi komeho e ta thikama mpoka pwali pwa thikama omusamane Pienaar ngoka a saluta epandela ndyoka lya londoloka.
Nujoma okwa thikama e ta saluta epandela lyaNamibia ndyoka lya londo lwotango nolya pingene po ndyoka lyaSouth Afrika moshilandopangelo shaNamibia, Ovenduka.
Nuyoma nokwa gandja oshipopiwa she shotango onga omupresidende gwaNamibia.
Nena ndjika mo21 gaMaalitsa go2024 Omupresidende gwaNamibia omusamane Nangolo Mbumba oku li moKatima Mulilo pamwe naakwanepangelo yaza kOvenduka osho wo aakwashigwana yomOshitopolwa shaZambezi, taya dhimbulukwa nokutyapula emanguluko lyoshilongo okuza muukoloni wepangelo lyokatongotongo lyaSouth Afrika.
Oshituthityapulo shika shemanguluko lyaNamibia, tashi ningilwa moZambezi lwotango oshoku tyapula sho Namibia a gwanitha omimvo 34 e li oshilongo sha manguluka.
Methano: Namibia okwa manguluka.
