Esimaneko nali kalekwe po
kuMartin Negumbo /
Otashi vulika tashi eta oompata pokati koyendji mboka kaaye shi uuwanawa wesimaneko osho wo mboka ya kwatela po esimaneko.
Esimaneko lyolyene olya konekiwa okuza nale ihe opu na yamwe kaaye shi ngele oli na oku endela pamwe nomikalo. Onkalo ndjika oya vuka unene maagundjuka yonena.
Esimaneko otali vulu oku kala shimwe shomiinima ya simana tayi ndjeke po uukuume waantu notali holola wo uukwatya wanakusimaneka.
Nonande pwa kala unene haku popiwa kutya aanona naya simaneke aakuluntu itashi imbi nenge shi kandeke esimaneko li ze komukokele li ye kokanona.
Paempito dhimwe aayihokani nenge aashiinda osho wo aaniilonga pehala lyontumba otaya pumbwa wo esimaneko pokati kawo opo ya hume komeho.
Maagundjuka oyendji ye li moohole inaa dhi pitikwa kaakuluntu ohaya idhini e taya topolelathana uuhethi konima sho ya palutha esimaneko ndyoka lya li tali vulu oku ndjeka po ohole yawo.
Esimaneko nali kalekwe po e tali taandele moshigwana opo li ka adhike komapipi tage ya, na ekumagidho ndi na maagundjuka mboka yi iyoteka nenge haya kala pamwe olyo ndika kutya isimanekeni e tamu yambula po uuhole weni sigo tawu ningi ohole yoyene.
Molwaasho dhokana ihadhi gogoka, nandi hulile monena mpaka. Inamu dhimbwa kutya ondemu simaneka amuhe aaleshi yoshikundaneki shOmutumwa. Tangi unene.
– Martin Negumbo oye omunyoli gwiiyolithi nuuhokololo tawu gandja omayele koshigwana. Oye wo omukuluntupitithiinyolwa yOmutumwa mOshiwambo. Ota monika konomola 0813773399.
