Ku Martin Negumbo /

Oliha ndjoka ya kala uulethimbo hayi dhanenwa pokapale komaudhano kaMvula pOmusaati Gopoosa onkene tayi pula komeho momaudhano gayo gedhingoloko lyotango.

Uudhano wetanga lyokoompadhi mbuka owo shimwe shomiinima ya simana tayi vulu oku gongaleka oshigwana uuna tashi ya komayinyanyudho gatyole.

Oliha ndjika oya li ya tameke konima yuulethimbo wu thike pomimvo omulongo nantano, notayi tula ondondo yokatanga kokoompadhi pombanda moshitopolwa shaShana. Oosipana dhilwe dha tota po oliha ndjika odha ya koliha ontiyali yaShana.

Ngoka e li nokwa kala omupresidente gwoliha ndjika Herman Kalimbo okwa hokolola uudhano tawu ende ngaashi a kala a tegelela sigo opethimbo ndika.

Kalimbo pamwe newiliko lyuudhano mbuka oya hokolola inaaya tsakaneka omashongo nomayipumo mumwe pokati kaadhani yoosipana dha yoolokathana ndhoka dha kutha ombinga muudhano mbuka.

Uudhano mbuka nonande owu li medhingoloko lyotango omu na oosipana ndhoka tadhi shi enditha nawa nokwa tegelelwa dhi ka ete iizemo tayi etitha oonkondo pehulilo lyedhingoloko lyotango.

Oosipana tadhi indjipaleke enyanyu muudhano mbuka ongaashi Amunganda FC, noGK FC, osho wo Omaalala FC.

Kalimbo okwa pandula aadhani yaAmunganda FC sho taye shi enditha nawa ye li kohi yewiliko lyomudhani omukulu Thomas Erickson nomukwatheli gwe Ampweya Immanuel.

Mbaabala ogumwe gomaahikihiya ya menekela mokufudhila ohiya, noku li wo natango ta ndjeke po aahikihiya aape muudhano mbuka.

Festus Kambonde ogumwe gomaatali yuudhano wehuliloshiwike lya piti nokwa li a hokololele oshikundaneki shino nkene u uvite nayi konima yosipana yawo ndjoka ha yambidhidha ya dhengwa 1-0.

Aatali oya li ya holoka momwaalu ogundji ngaashi sha tegelelwa, naChester Katongo pethimbo a talele po okapale okwa koneke kutya nani uudhano wetanga lyokoompadhi owo ashike ondhimbo tayi vulu oku dhenga ezaza.

Osipana hayi yambuka pwaAmunganda oya thamunwa yi na aadhani taya dhana nawa sigo opo mpaka, unene ngaashi Fabi, a tseyika nedhina Mr Cash.

Kalimbo okwa tsu omukumo aadhani yoosipana adhihe dha kutha ombinga moliha ndjika yi itule mo opo ya pondole sha. Ta gwedha ko ta ti esimaneko nali tetekele uudhano opo ku yandwe omayipumo mumwe pokati kaadhani naahikihiya.

Momathano: Aahikihiya osho wo dhimwe dhomoosipana tadhi dhana moliha ontintatu yokomikunda dhaMaalala.