Shambe, Tuyeni, nOnkoshi mohambo
[Okayolithi] kuMartin Negumbo \
Shambe naTuyeni oya li ookuume.
Kakele kuukuume wawo mboka waza nale sho ya li uumatyona, aasamane yaali mbaka oyali aanankondo noyali ye hole iimuna, unene oyali haya dhiginine oonkwandambi.
Sho uulithilo wa ningi tawu kana po pomikunda dhaandjawo, oya tokola opo ya ka dhike ohambo yawo kiisaati ya taandela hoka komakuti ku na omwiidhi gwa fa iihuna.
Omupya munene aalumentu mbaka kayali ya pula nawa kombinga yonkalo yopehala mpoka, ihe oyekeshi imonena kutya pehala mpoka oonkoshi ihadhi pu po nande nande.
Oya li ya nyanyukwa shili noya li taya itangele uupenda wawo sho ya thigipo oshilongo e taya eta oongombe dhawo huka. Oya li taye itungile uugumbo nkene taya ka shuna kegumbo noongombe dhoondoka, yo taya ka hokana aakulukadhi ya gwedhwapo nokuli.
Ihe ongulohi yimwe konima ashike yomasiku gatatu sho ya li uulalelo oya uvu nkene shinime shawakemba tayi pumbu, ashike kayali kokule nohambo yawo.
Oyali ashike yi li omukaakena gwoshinano tashi vulu oku endwa komuntu oonkatu omilongo mbali nantano.
Uumbanda owa adha aalumentu, noya tema omulilo meendelelo oshoka shinime ke hole omulilo. Ihe inashi kwatha sha.
Onkoshi oye ya ya ukilila poshigunda, nongele oho popilile oto hala u tye nkeyama oyiithanwa komulilo ngu gwa temwa.
Oya nukile okalumetana kamwe koshigunda etayika nanene piihwa yi li popepi opo yika inyangushepo.
Huka aalumentu kaye na mpa pwali itaapu zi omeya komalutu gawo pethimbo lyoshiningwanima.
Sho nokuli omulilo gwa fa itaagu tema nawa, oye ekele mo ashike ekumbatha lyawo limwe momulilo.
Engwangwano otali dhimbululwa unene muShambe ngu a li ta popi e li kohi yuumbanda wekatalume, nonando okwa li ngaa ta hala oku uka lwokoshigunda.
Okwa lombwele mukwawo ta ti: “Kodhola ndi tale sho ya minikila.” A hala kutya minikila ndi tale sho ya kodhola.
Hwiyaka komulilo Tuyeni naye okwa ningi oshihakanwa shuukatalume sho a kutha oshikuni shomulilo a kwata hu kwa tema ta pula mukwawo ta ti: “Oye ya mbela?”
Yemwene okwa li ngaa a hala a pule ngele oya ya. Ihe ota ti owala: “Oye yaa?” Omuntu oto kumwa nee kutya pamwe kali ta pi oshoka okwali a kwata oshikuni a dhiginina.
Shambe sho u uvu taku tiwa oye ya, ye okwa galuka ko koshigunda. “To pi nena!”
“Ahawe, to likitha ndje maani! Nani owa hala nda lika po?” Tuyeni ta ti sho taku tiwa oshikuni neshi ethe.
Lago enene onkoshi inayi galuka we. Ihe aalumentu oya lala ya thikama uusiku awuhe, noya hingi oongombe dhawo pethimbo lyiitumbetango noya shuna koshilongo.
