Ehokololo lya zi koSouth Africa uunambo olya ti kutya uunona utatu owa si konima sho wa lya oshithima hashi ningwa muusila hawu tiwa ‘instant porridge’ hawu longwa kehangano lyaNamibia lyedhina Namib Mills.
Molwa omaso ngano, uupakete awuhe wo ‘Top Score Instant Porridge’ owa kuthwa mo moolaka dhoositola omanga taku ningwa omakonakono gomuule ku monike osheetithi shomaso ngoka.
Momushangwa wa gandjwa kiikundaneki Namib Mills okwa ti okwa haluthwa kehokololo ndyoka tali popi kutya omaso oge etithwa koshithima shuusila waNamib Mills.
“Tango tango natu tye ekanitho lyomwenyo, unene tuu lyuunona uushona, olyo oshinima shi nikitha oluhodhi unene, notatu gandja omahekeleko kaakwanezimo mboka ya gumwa koshiponga shika,” meme Marne Bouwer ngoka oye gumwe gwaanambelewa aakuluntu moNamib Mills ta ti.
“Nonando kapu na uuyelele natango tawu ulike kutya omaso oge etithwa kuusila wetu, ihe otatu tala ko oshinima shika shi li oshinene.
“Opo ano otwa ninga etokolo lyoku kutha mo moolaka iilongomwa ayihe yoTop Score Instant Porridge momalandithilo agehe omanga omakonakono gomuule taga ningwa. Shika otashi ningwa opo tu kwatele po uukalinawa woshigwana.
“Otu li tatu gandja elongelokumwe momakonakono taga ningwa, natse wo otatu ningi omakonakono getu opo kehe shimwe shi ye puuyelele.”
Bouwer okwa gwedha ko ta ti moNamib Mills oya tala ko uundjolowele woshigwana owo wa simana, nohaya tula iilongomwa yawo koshiyalo opo yi kale pondondo yopombanda moku palutha oshigwana.
Methano: Olaka ndjika mositola Woermann & Brock Eluwa Market mOshakati oya yela sho uuinstenta awuhe wa kuthwa mo kooyene yositola.
