Aapresidende yaNamibia ayehe yatatu, okuza komukokoli Sam Nujoma, Hifikepunye Pohamba sigo Hage Geingob, oya tanga iilonga ya longwa kuMatheus Shikongo ngoka a li a mana oondjenda momasiku 13 May 2021.

Aawiliki mbaka yoshilongo oya gandja iipopiwa yawo poshituthidhimbulutho shanakusa shoka sha ningilwa mOvenduka nena.

Nujoma okwa ti Shikongo oye gumwe gwomaakondjelimanguluko mboka ya longa pamwe noonakulwa yoPlana mboka ya lwitha oombulu meni lyoshilongo.

“Ombepo yekondjelomanguluko oya li ya kwata Shikongo omanga a li mosikola yuulongi mOngwediva. Ihe sho a tidhwa mosikola e ta yi kOvenduka okwa tsikile niilonga ye yekondjelomanguluko.

“Esiku limwe Shikongo okwa li a humbata aakwiita niilwitho okuza kOshivelo sigo okOshomeya,” Nujoma ta ti.

Nujoma okwa ti oshilonga sha longwa kuShikongo shekondjelomanguluko inashi tseyika koyendji oshoka Shikongo okwa li omuntu omuishonopeki.

Pohamba okwa tumbula wo kutya nakusa Shikongo okwa li omunangeshefa kapyoko ngoka a gandja oshiholelwa kaanangeshefa aagundjuka oyendji.

Geingob okwa ti Shikongo okwa li wo omuwiliki omuwanawa sho a li oye meya gwotango omuluudhe gwoshilando shaVenduka konima sho oshilongo sha manguluka.

“Okwa li omudhiginini gwiilonga, nokwa longele oshilongo nuuntsa,” Geingob ta ti.

Shikongo okwa li oye mwene gwoongeshefa dhedhina ABC pOkapya, mOndangwa, oshowo mOmuthiya. KOvenduka okwa li e na ko oongeshefa dhimwe mwa kwatelwa okalaba ya li ya tseyika nawa moKatutura yedhina Club Thriller.

Shikongo ota fumvikwa ngula mOvenduka.

Methano: Nakusa Matheus Kristof Shikongo pethimbo a li meya gwaVenduka.