Ongeshefa yedhina Ndipwa Trading cc oya pewa ekwatho lyokapandi koshimaliwa shi thike poN$50 000 sho oyo ya tothwa mo yi sindane po onomola yotango mopolohalama yoOld Mutual Sustainable, Economic Empowerment Drive (OMSEED) mOshitopolwa shaMusati.
Ndipwa Trading oha longo oshikunino shiihape, ihe oku na wo oshitopolwa shoku longa iikulya yiimuna. Iilonga mbika yiikulya yiimuna oyo ya li ya fuula aanambelewa yaOld Mutual mboka ya li ya talele po ongeshefa ndjika momukunda Okafa Koishongo mOshikandjohogololo shaUtapi.
Omusamane Sakeus Ndipwashimwe okwa li a nyanyukwa sho a pewa ekwatho ndika lyoshimaliwa, sha ningilwa mOutapi ohela.
“Ohatu longo iikulya yiimuna okuza moshimeno shomoringa, nomolusiana, osho wo mepungu,” Ndipwashimwe ta ti. “Oondando dhetu odhi li pevi lela, nokuli dhi li metata lyoondando dhayakwetu.”
Omusamane Petrus Daniel, a tseyika nedhina Shalimau, gwokEtunda kOshikandjohogololo shaRuacana oye a li a sindana po ondondo ontiyali, e ta pewa ekwatho lyoshimaliwa shi thike poN$30 000. Shalimau oha longo iihape nomapungu moshikunino she.
Puutitatu opu na meme Welmine Amupolo gwomomukunda Ondjamba, mOshikandjohogololo shaEtayi, ngoka a mono ekwatho lyoshimaliwa shi thike poN$20 000.
Tate Mathew Nambadi ngoka oye omukuluntu gwoombelewa dhaOld Mutual mOutapi sigo okoKunene okwa ti oya li ya yakula omaindilo ge thike pomilongo ntano, ngoka ga li ga tuminwa kOvenduka.
Momaindilo ngaka omwa li mwa tothwa mo ye li omulongo oyo ya talelwe po poongeshefa dhawo nokutala nkene hadhi longo noku mona kutya odha pumbwa omakwatho ga tya ngiini. Opo nduno mwa tothwa mo ye li yatatu oyo ya mone omakwatho ngaka.
“Mba mwa sindana e tamu pewa omakwatho ngano nena otamu ka tuminwa kOvenduka komadheulo gongeshefa taga ka kala ko momasiku 8 sigo 12 Sepetemba,” Nambadi ta ti.
“Mba mwa sindana, itamu pewa oshimaliwa koomuna ihe otamu etelele uuinvoisa waza koositola hoka mwa hala mu landelwe iipumbiwa ayihe mbyoka mweyi pumbwa pangushu yoshimaliwa mweshi sindana nena.”
Omanga aasindani mbaka yatatu inaya igidhwa, okwa ningwa tango omadheulo ga ningilwa aantu ye li 21 mboka ya li po. Omadheulopukululo muunangeshefa ngaka gopolohalama “On The Money” oga ningwa komusamane Michael Shapopi.
Aanambelewa yaOld Mutual mboka ya li ya talele po oongeshefa nokutotha mo aasindani oyo Caroline Tjihero naBonita Salomo.
Methano: Bonita Salomo, Sakeus Ndipwashimwe, Mathew Nambadi, naCaroline Tjihero. Methano ekwawo oye Welmine Amupolo.
