Omabanana oga tamekwa oku longwa moshikunino Etunda mOshitopolwa shaMusati, shoka sha nyanyudha aanambelewa yehangano lyedhina Namibia Agronomic Board.
Namibia Agronomic Board (NAB) opamwe nehangano lyedhina AvaGro oya li ya ningi omalolelopekapeko e taya kunu omiti dhomabanana mehala li li mEtunda li thike poohekita 0,6.
Nasho omiti dha koko e tadhi imi, aanambelewa yaNAB pamwe noyaAvagro oya li ya thiki mEtunda etitano lyaziko pamwe naatoolinkundana osho wo aakwashigwana yontumba e taya teya omabanana.
Omunambelewa gwaNAB Gilbert Mulonda okwa ti nani osha simana okuninga omalolelopekapeko.
“Otwa itaaleni kutya evi lyetu nonkalo yombepo itayi pitike oku kuna omaapela nenge omabanana. Ihe nani hasho. Omabanana ogo ngaka twege longa mEtunda. Ngele ito ningi omalolelo oto kala owala ino eta p osha.
“Tse koNAB otwa hala lela okuninga omalolelo, opo tu ete po iiyimati kehe.”
Methano: Kansela gwOshikandjohogololo Onesi tate Petrus Festus a thikama pehila lyoobanana li na oshiviha sho 35 kg.
